హెల్మెట్ తప్పనిసరి.. నిబంధనలు పాటించాలి వాహనదారుల భద్రతే లక్ష్యం వల్లూరు ఎస్సై సూర్యనారాయణ రెడ్డి
హెల్మెట్ తప్పనిసరి.. నిబంధనలు పాటించాలి
వాహనదారుల భద్రతే లక్ష్యం
వల్లూరు ఎస్సై సూర్యనారాయణ రెడ్డి
వల్లూరు మేజర్ న్యూస్
వాహనదారులు రహదారి భద్రతా నిబంధనలు పాటిస్తూ, తమ కుటుంబాలను దృష్టిలో ఉంచుకొని బాధ్యతాయుతంగా వాహనాలు నడపాలని వల్లూరు ఎస్సై సూర్యనారాయణ రెడ్డి సూచించారు. కడప - తాడిపత్రి జాతీయ రహదారిపై వల్లూరు మండల పరిధిలోని ఏ. ఓబయపల్లి బస్స్టాండ్ వద్ద బుధవారం ఎస్సై సూర్యనారాయణ రెడ్డి ఆధ్వర్యంలో పోలీసులు విస్తృతంగా వాహన తనిఖీలు నిర్వహించారు. ఈ సందర్భంగా వాహనదారులకు రహదారి భద్రత, ట్రాఫిక్ నిబంధనలపై అవగాహన కల్పించారు. ప్రాణ రక్షణకు హెల్మెట్ అత్యంత కీలకం. ద్విచక్ర వాహనదారులు తప్పనిసరిగా నాణ్యమైన హెల్మెట్ ధరించి, దానిని సరిగా బిగించుకొని వాహనం నడపాలని ఎస్సై సూచించారు. హెల్మెట్ కేవలం పోలీసుల తనిఖీలకు భయపడి ధరించేది కాదని, ప్రమాద సమయంలో ప్రాణాలను కాపాడే రక్షణ కవచమని తెలిపారు. వాహనంపై ప్రయాణించే వ్యక్తి కూడా హెల్మెట్ ధరించడం ద్వారా తలకు తీవ్ర గాయాల ప్రమాదాన్ని తగ్గించుకోవచ్చని పేర్కొన్నారు. అదేవిధంగా వాహనం నడిపే వ్యక్తి తప్పనిసరిగా చెల్లుబాటు అయ్యే డ్రైవింగ్ లైసెన్స్ కలిగి ఉండాలని, ప్రతి వాహనానికి నమోదు ధ్రువపత్రం (ఆర్సీ), బీమా పత్రం, రహదారి పన్ను తదితర అవసరమైన ధ్రువపత్రాలు ఉండాలని తెలిపారు. వాహనాన్ని నడిపే ముందు అన్ని పత్రాలు సక్రమంగా ఉన్నాయో లేదో నిర్ధారించుకోవాలని సూచించారు. తనిఖీల సందర్భంగా అవసరమైన ధ్రువపత్రాలు లేని వాహనాలపై నిబంధనల ప్రకారం జరిమానాలు విధించినట్లు ఎస్సై తెలిపారు. మద్యం సేవించి వాహనాలు నడపడం, అతివేగం, నిర్లక్ష్యపు డ్రైవింగ్ వంటి చర్యలకు దూరంగా ఉండాలని వాహనదారులకు సూచించారు. ప్రతి వాహనదారుడు తన ప్రాణంతో పాటు ఎదుటివారి ప్రాణాల భద్రతను కూడా దృష్టిలో పెట్టుకోవాలి. కుటుంబ సభ్యులు మన కోసం ఎదురుచూస్తుంటారు. కాబట్టి తొందరపడకుండా, ట్రాఫిక్ నిబంధనలు పాటిస్తూ జాగ్రత్తగా వాహనం నడిపి సురక్షితంగా ఇంటికి చేరాలని ఎస్సై సూర్యనారాయణ రెడ్డి తెలిపారు. రహదారి భద్రతపై ప్రజల్లో అవగాహన పెంచడంతో పాటు, వాహన నిబంధనలను కచ్చితంగా అమలు చేయడమే లక్ష్యంగా తనిఖీలు కొనసాగుతాయని పేర్కొన్నారు. ఈ కార్యక్రమంలో పోలీసు సిబ్బంది పాల్గొన్నారు..
