హైవే పై ప్రమాదాల నివారణకు విజిబుల్ పోలీసింగ్!

రంగంలోకి నర్సీపట్నం డీఎస్పీ పోతిరెడ్డి శ్రీనివాసరావు

ఎస్.రాయవరం, అక్టోబర్ 1, మేజర్ న్యూస్:
ఎస్.రాయవరం మండల పరిధిలోని హైవేపై ఇటీవల వరుసగా రోడ్డు ప్రమాదాలు జరుగుతున్న నేపథ్యంలో నర్సీపట్నం పోలీస్ సబ్ డివిజన్ డీఎస్పీ పోతిరెడ్డి శ్రీనివాసరావు గురువారం స్వయంగా రంగంలోకి దిగారు. ప్రమాదాల నివారణలో భాగంగా విజిబుల్ పోలీసింగ్ నిర్వహించారు. వాహనదారులకు ట్రాఫిక్ నిబంధనలపై అవగాహన కల్పిస్తూ స్వయంగా చలానాలు విధించారు.

హెల్మెట్ ఖచ్చితంగా ధరించాలి... డీఎస్పీ:
ద్విచక్ర వాహనదారులు కచ్చితంగా హెల్మెట్ ధరించాలి. ప్రతి వాహనానికి కంపల్సరీగా ఇన్సూరెన్స్ కలిగి ఉండాలి. వాహనాల వేగాన్ని నియంత్రణలో ఉంచుకోవాలి. మైనర్లు ఎట్టి పరిస్థితుల్లోనూ డ్రైవింగ్ చేయకూడదు. రోడ్డు ప్రమాదాలను నివారించేందుకు ప్రతి ఒక్కరూ ట్రాఫిక్ నియమాలు పాటించాలని, నిబంధనలు ఉల్లంఘించిన వారిపై కఠిన చర్యలు తీసుకుంటామని డీఎస్పీ శ్రీనివాసరావు హెచ్చరించారు.