బీసీ రిజర్వేషన్లపై హైకోర్టు తీర్పు బాధాకరం.. సుప్రీంకోర్టుకు వెళ్తాం: మంత్రి అచ్చెన్నాయుడు

అమరావతి:స్థానిక సంస్థల్లో బీసీ రిజర్వేషన్లను తగ్గించేలా హైకోర్టు ఇచ్చిన తీర్పు తీవ్ర బాధాకరమని రాష్ట్ర వ్యవసాయ శాఖ మంత్రి, టీడీపీ సీనియర్ నాయకుడు కింజరాపు అచ్చెన్నాయుడు వ్యాఖ్యానించారు. బీసీలకు కల్పించిన 34 శాతం రిజర్వేషన్లు కేవలం రక్షణ మాత్రమే కాదని, అది వారి రాజ్యాంగబద్ధమైన రాజకీయ హక్కు అని ఆయన స్పష్టం చేశారు.

హైకోర్టు ఇచ్చిన తీర్పుపై చట్టపరంగా ముందడుగు వేస్తామని, బీసీల హక్కుల పరిరక్షణ కోసం సుప్రీంకోర్టును ఆశ్రయించనున్నట్లు అచ్చెన్నాయుడు వెల్లడించారు. బీసీల రాజకీయ ప్రాతినిధ్యానికి, వారి ఆర్థిక-సామాజిక ఎదుగుదలకు తెలుగుదేశం పార్టీయే నాటి నుంచి నేటి వరకు బలమైన పునాది వేసిందని గుర్తుచేశారు.

ఈ న్యాయపోరాటంలో ప్రభుత్వం ఎట్టి పరిస్థితుల్లోనూ వెనక్కి తగ్గేది లేదని తేల్చి చెప్పారు. ఒకవేళ న్యాయస్థానాల్లో ప్రతికూల ఫలితం వచ్చినా, రాజకీయంగా తమ పార్టీ కట్టుబడి ఉందనే విషయాన్ని స్పష్టం చేశారు. అవసరమైతే తెలుగుదేశం పార్టీ తరఫునే రాబోయే ఎన్నికల్లో బీసీలకు 34 శాతం రాజకీయ అవకాశాలు మరియు టికెట్లు కల్పించి తీరుతామని ఆయన ప్రకటించారు.