బాధిత చిన్నారులకు భరోసా..! బాలల హక్కుల పరిరక్షణ కమిషన్ సభ్యుడు గంగ సూర్యనారాయణ

బాధిత చిన్నారులకు భరోసా

పోక్సో బాధిత బాలికకు అండగా ఉంటాం

జీజీహెచ్‌లో మూడు నెలల శిశువు ఆరోగ్యంపై ఆరా

బాలల హక్కుల పరిరక్షణ కమిషన్ సభ్యుడు గంగ సూర్యనారాయణ

కాకినాడ: పోక్సో కేసులో బాధితురాలైన ఎనిమిదేళ్ల బాలికకు అవసరమైన విద్య, వైద్యం, మానసిక సహాయంతో పాటు పునరావాస సేవలు అందేలా చర్యలు తీసుకుంటామని ఆంధ్రప్రదేశ్‌ రాష్ట్ర బాలల హక్కుల పరిరక్షణ కమిషన్ సభ్యుడు గంగ సూర్యనారాయణ తెలిపారు. కాకినాడలోని వన్‌స్టాప్‌ సెంటర్‌లో తాత్కాలిక సంరక్షణ పొందుతున్న బాలికను గురువారం ఆయన పరామర్శించారు.

బాలిక ఆరోగ్యం, భద్రతతో పాటు ప్రస్తుతం అందుతున్న సేవలపై సిబ్బందిని అడిగి తెలుసుకున్నారు. సంబంధిత శాఖల సమన్వయంతో ఆమెకు అవసరమైన సహాయం అందేలా చూస్తామని భరోసా ఇచ్చారు. ఈ సందర్భంగా తాళ్లరేవుకు చెందిన నడింపల్లి వినోద్ ఆయన వెంట ఉన్నారు.

శిశువు ఆరోగ్యంపై ఆరా

అనంతరం చట్టవిరుద్ధ దత్తతకు సంబంధించిన కేసులో శిశుగృహం సంరక్షణలో ఉన్న మూడు నెలల శిశువు ఆరోగ్య సమస్యలతో కాకినాడ ప్రభుత్వ సామాన్య ఆసుపత్రిలో చికిత్స పొందుతుండగా గంగ సూర్యనారాయణ పరామర్శించారు. వైద్యులతో మాట్లాడి శిశువు ఆరోగ్య పరిస్థితి, అందుతున్న చికిత్స గురించి తెలుసుకున్నారు.

శిశువుకు మెరుగైన వైద్యం, నిరంతర పర్యవేక్షణతో పాటు అవసరమైన పోషణ, ప్రత్యేక సంరక్షణ అందించాలని సూచించారు. సంబంధిత శాఖలు సమన్వయంతో శిశువు ఆరోగ్య పరిస్థితిని ఎప్పటికప్పుడు పర్యవేక్షించాలని అధికారులను కోరారు.

కార్యక్రమంలో జిల్లా బాలల పరిరక్షణ విభాగం సంరక్షణ అధికారి జాగరపు విజయ, వన్‌స్టాప్‌ సెంటర్‌ నిర్వాహకురాలు శైలజ, చైల్డ్‌ హెల్ప్‌లైన్‌ సమన్వయకర్త విజయ్‌, నాగలక్ష్మి, కేస్‌ వర్కర్‌ నరేష్‌ తదితరులు పాల్గొన్నారు.