అప్పుల బాధతో యువ రైతు ఆత్మహత్య.

కళ్యాణదుర్గం: అప్పుల భారం, పంటల సాగులో ఎదురైన నష్టాలు ఓ కౌలు రైతు కుటుంబంలో తీవ్ర విషాదాన్ని నింపాయి. కళ్యాణదుర్గం మున్సిపాలిటీ పరిధిలోని ముదిగల్లు గ్రామానికి చెందిన కౌలు రైతు అశోక్‌ (33) ఆత్మహత్యకు పాల్పడ్డాడు. వర్షాలు సరిగా కురవకపోవడంతో పంటలు నష్టపోయి, సాగు కోసం చేసిన అప్పులు పెరిగిపోవడంతో వాటిని తీర్చలేక మనస్తాపానికి గురైన ఆయన చెట్టుకు ఉరేసుకొని బలవన్మరణానికి పాల్పడినట్లు సమాచారం. అశోక్‌కు సొంత పొలంతో పాటు మరో 15 ఎకరాల భూమిని కౌలుకు తీసుకొని వ్యవసాయం చేసేవాడు. పంటలు సాగు చేసి కుటుంబాన్ని పోషించుకోవడంతో పాటు అప్పులు తీర్చవచ్చని ఆశపడ్డాడు. అయితే వర్షాభావ పరిస్థితుల కారణంగా పంటలు ఆశించిన స్థాయిలో పండకపోవడంతో పెట్టుబడులు తిరిగి రాలేదు. కౌలు చెల్లింపులు, సాగు ఖర్చులు, ఇతర అవసరాల కోసం చేసిన అప్పులు పెరిగి సుమారు రూ.20 లక్షల వరకు చేరినట్లు సమాచారం. పంటల ద్వారా ఆదాయం రాకపోవడం, మరోవైపు అప్పులు తీర్చాల్సిన పరిస్థితి ఎదురవడంతో ఆయన తీవ్ర ఆర్థిక ఇబ్బందులకు గురైనట్లు తెలుస్తోంది. అప్పుల భారాన్ని భరించలేక మనస్తాపంతో అశోక్‌ ఈ తీవ్ర నిర్ణయం తీసుకున్నట్లు సమాచారం. ఆయన మృతితో ముదిగల్లు గ్రామంలో విషాదఛాయలు అలముకున్నాయి. వ్యవసాయాన్ని నమ్ముకొని జీవనం సాగిస్తున్న రైతు కుటుంబంలో చోటుచేసుకున్న ఈ ఘటన గ్రామస్థులను కలచివేసింది. కౌలు రైతులు పెట్టుబడుల కోసం అప్పులు చేసి, ప్రకృతి అనుకూలించక పంట నష్టాలను ఎదుర్కొన్నప్పుడు ఆర్థికంగా నిలదొక్కుకోవడం కష్టంగా మారుతోంది. ఇలాంటి పరిస్థితుల్లో రైతులకు సకాలంలో ప్రభుత్వ సహాయం, పంట నష్ట పరిహారం, రుణ సంబంధిత వెసులుబాట్లు అందించాల్సిన అవసరం ఉందనే అభిప్రాయాలు వ్యక్తమవుతున్నాయి. కుటుంబానికి ఆధారంగా ఉన్న వ్యక్తిని కోల్పోవడంతో అశోక్‌ కుటుంబం తీవ్ర విషాదంలో మునిగిపోయింది. ఈ ఘటనకు సంబంధించిన పూర్తి వివరాలు, పోలీసుల విచారణ సమాచారం అధికారికంగా ధ్రువీకరించాల్సి ఉంది.
కళ్యాణదుర్గం సూర్య ఇంచార్జ్ :- సుధామోహన్.