అపోలో ఆసుపత్రికి అరుదైన ఘనత

ఆరిలోవ, సూర్య : విశాఖపట్నంలోని అపోలో ఆసుపత్రి ఆర్థోపెడిక్స్ విభాగాధిపతి, ప్రొఫెసర్ డాక్టర్. అబ్దుల్ డి. ఖాన్ సమర్పించిన ఏడు వైద్య పరిశోధనా పత్రాలు ప్రతిష్టాత్మక డాక్టర్ కె.వి. శ్రీవాస్తవ మెడల్ అవార్డు విభాగంలో ప్రదర్శనకు ఎంపికయ్యాయి. డిసెంబర్ లో అహ్మదాబాద్ లో జరగనున్న ఇండియన్ ఆర్థోపెడిక్ అసోసియేషన్ వార్షిక జాతీయ సదస్సు (ఐఓఏసిఓఎన్)లో ఈ పరిశోధనా పత్రాలను ప్రదర్శించనున్నారు.ఒకే వైద్యుడు సమర్పించిన ఏడు పరిశోధనా పత్రాలూ ఈ పురస్కార విభాగంలో ప్రదర్శనకు ఎంపిక కావడం అరుదైన ఘనతగా వైద్య వర్గాలు పేర్కొంటున్నాయి. ఈ మేరకు ఇండియన్ ఆర్థోపెడిక్ అసోసియేషన్ శాస్త్రీయ కమిటీ అధికారికంగా ఎంపిక సమాచారాన్ని లేఖ ద్వారా తెలియజేసింది.మోకాలు, భుజం కీళ్లకు సంబంధించిన ఆధునిక ఆర్థ్రోస్కోపిక్ చికిత్సా విధానాలపై రెండేళ్ల ఫాలోఅప్ ఫలితాలను ఈ పరిశోధనలు వివరిస్తున్నాయి. మెనిస్కన్ రివర్, ఏసిఎల్ రీకన్స్ట్రక్షన్, రొటేటర్ కఫ్ రిపేర్ వంటి శస్త్రచికిత్సల ఫలితాలతో పాటు, మోకాలు, తుంటి కీళ్ల అరిగిపోవడం చికిత్సలో ఆర్థోబయాలజిక్స్ వినియోగంపై స్వల్పకాలిక ఫలితాలను కూడా పరిశోధకులు విశ్లేషించారు.
ఈ చికిత్సలు పొందిన రోగులందరిలో మంచి పనితీరు, కదలికల సామర్థ్యం మెరుగుపడినట్లు పరిశోధనల్లో వెల్లడైంది. అందించిన వైద్య సేవల పట్ల రోగులు సంతృప్తి వ్యక్తం చేస్తూ అపోలో ఆసుపత్రి యాజమాన్యానికి కృతజ్ఞతలు తెలిపారు.ఈ సందర్భంగా అపోలో ఆసుపత్రి విశాఖపట్నం చీఫ్ ఆపరేటింగ్ ఆఫీసర్ డాక్టర్ కృష్ణ ప్రసాద్ మాట్లాడుతూ, ఈ గుర్తింపు ఆధునాతన ఆర్థోపెడిక్ చికిత్సలు, వైద్య పరిశోధనలు, విద్యా రంగంలో అపోలో ఆసుపత్రి అందిస్తున్న సేవలకు నిదర్శనమని పేర్కొన్నారు. జాతీయ స్థాయిలో ఆసుపత్రి ఆర్థోపెడిక్స్ విభాగానికి ఈ ఘనత గుర్తింపు తీసుకువచ్చిందని తెలిపారు.