ఆర్టీసీ డిపోలో ఘనంగా జల సంరక్షణ దినోత్సవం

​కావలి, మేజర్ న్యూస్ :  నీటిని ప్రతి ఒక్కరూ బాధ్యతగా పొదుపు చేయాలని కావలి ఎపీఎస్‌ఆర్టీసీ డిపో మేనేజర్ డి. ఆదినారాయణ పిలుపునిచ్చారు. 'బ్రిక్స్ సుస్థిర జీవనశైలి వారోత్సవాలు'లో భాగంగా మంగళవారం కావలి ఆర్టీసీ డిపోలో జల సంరక్షణ దినోత్సవాన్ని ఘనంగా నిర్వహించారు.
​ఈ సందర్భంగా డిఎం ఆదినారాయణ మాట్లాడుతూ, దైనందిన జీవితంలో చిన్న చిన్న మార్పుల ద్వారా వేలాది లీటర్ల నీటిని ఆదా చేయవచ్చని తెలిపారు. ఇళ్లు, గ్యారేజీలు, బస్టాండ్లలో ట్యాంకులు, కుళాయిల లీకేజీలను వెంటనే అరికట్టాలని సూచించారు. వాహనాలను నేరుగా పైపులతో కాకుండా బకెట్, తడిగుడ్డతో శుభ్రం చేయాలని, ప్రతి ఒక్కరూ ఇంకుడు గుంటలు ఏర్పాటు చేసుకుని భూగర్భ జలాలను పెంపొందించాలని కోరారు.  ​అనంతరం సిబ్బందితో నీటి పొదుపుపై ప్రతిజ్ఞ చేయించారు. ఈ కార్యక్రమంలో అసిస్టెంట్ ఇంజనీర్ ఎస్.కె. ఖాజా మొహిద్దీన్, సీనియర్ ట్రాఫిక్ ఇన్‌స్పెక్టర్ ఎం. రామకృష్ణ, బస్టేషన్ సూపర్‌వైజర్ డి. రవిప్రకాష్, మెకానిక్ సూపర్‌వైజర్లు నజీర్ ఖాన్, నవాజ్ బేగ్ తదితర సిబ్బంది పాల్గొన్నారు.