నేటి నుంచి నగరంలో జీఏఎన్ఎస్ఐడీ కాంగ్రెస్ 2026 సదస్సు

అమీర్‌పేట,మేజర్ న్యూస్:రక్త సంబంధిత వ్యాధులకు సంబంధించిన అంశాలపై చర్చా వేదిక కానున్న జీఏఎన్ఎస్ఐడీ కాంగ్రెస్ 2026 నగర వేదికగా ప్రారంభం కానుంది. నేటి నుంచి జరిగే ఈ నాలుగో ఎడిషన్ సదస్సులో సికిల్ సెల్ ఎనీమియా,తలసేమియా,ఇతర వంశపారంపర్య రక్త సంబంధిత వ్యాధుల గురించి చర్చించనున్నారు.అందుకు సంబంధించిన వివరాలను గ్లోబల్ యాక్షన్ నెట్వర్క్ ఫర్ సికిల్ సెల్ అండ్ అదర్ ఇన్‌హెరిటెడ్ బ్లడ్ డిజార్డర్స్ (జీఏఎన్ఎస్ఐడీ) చీఫ్ ఎగ్జిక్యూటివ్ ఆఫీసర్ లాన్రే తుంజి అజాయి,తలసేమియా అండ్ సికిల్ సెల్ సొసైటీ అధ్యక్షుడు చంద్రకాంత్ అగర్వాల్ వెల్లడించారు.ఈ విషయమై గురువారం ఏర్పాటు చేసిన సమావేశంలో వారు మాట్లాడుతూ ఈ సదస్సు జీఏఎన్ఎస్ఐడీ సంస్థతో భాగస్వామ్యం ద్వారా రక్త సంబంధిత వ్యాధుల నివారణకు అంతర్జాతీయ సహకారాన్ని బలోపేతం చేయడంపై ప్రత్యేక దృష్టి సారిస్తోందన్నారు.అంతేకాకుండా సంబంధిత వ్యాధులపై అవగాహన పెంచడం,రోగులకు,వారి కుటుంబాలకు మెరుగైన ఆరోగ్య సంరక్షణ,మద్దతు వ్యవస్థలను అందించాలని లక్ష్యంగా పెట్టుకుందన్నారు. సదస్సుకు 27 దేశాలకు చెందిన వక్తలతో పాటు మొత్తం 700ల మంది రిజిస్టర్డ్ ప్రతినిధులు హాజరవుతారని అంచనా వేస్తున్నామన్నారు. జాతీయ,అంతర్జాతీయ వైద్య నిపుణులు,పరిశోధకులు,ఆరోగ్య సంరక్షణ నిపుణులు,రోగుల సంఘాల ప్రతినిధులు, పాలసీ రూపకర్తలు,వంశపారంపర్య రక్త సంబంధిత వ్యాధుల రంగంలో పనిచేస్తున్న సామాజిక కార్యకర్తలు పాల్గొంటారని వెల్లడించారు. ఈ సమావేశంలో తలసేమియా అండ్ సికిల్ సెల్ సొసైటీ చీఫ్ మెడికల్ రీసెర్చ్ ఆఫీసర్,సెక్రటరీ డాక్టర్ సుమన్ జైన్,సీనియర్ వైస్ ప్రెసిడెంట్ రత్నావళి, జాయింట్ సెక్రటరీ అలీమ్ బేగ్,మనోజ్ రూపణి,నరేష్ రాఠి తదితరులు పాల్గొన్నారు.