telangana
కొడంగల్ వెంకన్న ఆలయానికి మహర్దశ.. పునర్నిర్మాణ పనుల పరిశీలనతో పాటు ప్రజలతో సీఎం రేవంత్ రెడ్డి ఆత్మీయ కలయిక
కొడంగల్, మేజర్ న్యూస్: వికారాబాద్ జిల్లా కొడంగల్‌లోని ప్రసిద్ధ పుణ్యక్షేత్రం శ్రీ మహాలక్ష్మి వెంకటేశ్వర స్వామి దేవస్థానాన్ని అత్యంత వైభవంగా తీర్చిదిద్దే దిశగా ముఖ్యమంత్రి ఎ. రేవంత్ రెడ్డి ప్రత్యేక దృష్టి సారించారు. పేదల తిరుపతిగా పేరొందిన ఈ ఆలయ పునర్నిర్మాణ పనులను ముఖ్యమంత్రి పరిశీలించి, పనుల పురోగతిపై అధికారులను వివరాలు అడిగి తెలుసుకున్నారు. ఆలయ అభివృద్ధికి సంబంధించి అధికారులకు పలు సూచనలు చేశారు. అంతకుముందు బాలాలయంలో శ్రీ వెంకటేశ్వర స్వామివారిని దర్శించుకున్నారు.ఆలయానికి ఉన్న ప్రాధాన్యతను దృష్టిలో ఉంచుకుని పునర్నిర్మాణ పనులను పకడ్బందీగా చేపట్టి, దేవస్థానాన్ని వైభవోపేతంగా తీర్చిదిద్దాలని అధికారులకు సూచించారు. ఆలయ అభివృద్ధి పనులను ప్రణాళికాబద్ధంగా ముందుకు తీసుకెళ్లాలని దిశానిర్దేశం చేశారు.దసరా పండుగను పురస్కరించుకుని ముఖ్యమంత్రి రేవంత్ రెడ్డి కొడంగల్‌లోని తన నివాసంలో నియోజకవర్గ ప్రజలు, స్థానిక నాయకులతో ఆత్మీయంగా సమావేశమయ్యారు. పెద్ద సంఖ్యలో తరలివచ్చిన ప్రజలు, నాయకులు ముఖ్యమంత్రిని కలిసి దసరా శుభాకాంక్షలు తెలియజేశారు.
ఈ సందర్భంగా సీఎం ప్రతి ఒక్కరినీ ఆప్యాయంగా పలకరిస్తూ వారి యోగక్షేమాలను అడిగి తెలుసుకున్నారు.పండుగ వేళ ముఖ్యమంత్రి నివాసానికి ప్రజలు, నాయకులు పెద్ద సంఖ్యలో తరలిరావడంతో కొడంగల్‌లో సందడి నెలకొంది. ఒకవైపు ప్రసిద్ధ ఆలయ పునర్నిర్మాణ పనుల పరిశీలన, మరోవైపు నియోజకవర్గ ప్రజలతో ఆత్మీయ సమావేశంతో ముఖ్యమంత్రి పర్యటన ప్రాధాన్యత సంతరించుకుంది. ఈ కార్యక్రమంలో జిల్లా కలెక్టర్ దీపక్ తివారి, జిల్లా ఎస్పీ స్నేహ మెహ్రా, జిల్లా అధికారులు, పార్టీ నాయకులు, కార్యకర్తలు తదితరులు పాల్గొన్నారు.
రిపోర్టర్: ఆబిద్, కొడంగల్, వికారాబాద్ జిల్లా.
