ఎల్‌నినోపై రాజకీయాలు కాదు.. ప్రజలకు అండగా నిలవాలి

హైదరాబాద్ :ప్రకృతి విపత్తులు, వాతావరణ సవాళ్లను ఎదుర్కొంటున్న వేళ ప్రభుత్వంపై విమర్శలు చేయడం మాని ప్రజలకు అండగా నిలవడమే రాజకీయ పార్టీల బాధ్యత అని ఉప ముఖ్యమంత్రి భట్టి విక్రమార్క అన్నారు. శుక్రవారం ప్రజాభవన్‌లో టీపీసీసీ ఆధ్వర్యంలో ప్రజాప్రతినిధులు, పార్టీ ముఖ్య నాయకులతో నిర్వహించిన ఎల్‌నినో అవగాహన, ఎమ్మెల్సీ ఎన్నికల సమావేశంలో ఆయన మాట్లాడారు. కరోనా సమయంలో మోదీ ఇచ్చిన పిలుపుకు ప్రజలంతా ఎలా స్పందించారో గుర్తుచేస్తూ, ఇప్పుడు ఎల్‌నినో ప్రభావంతో వర్షాభావ పరిస్థితులు నెలకొన్న వేళ ప్రతిపక్షాలు రాజకీయ బురదజల్లే యత్నాలు విడనాడి నిర్మాణాత్మక సూచనలు ఇవ్వాలని హితవు పలికారు. రాష్ట్రంలోని 621 మండలాలకు గాను 324 మండలాల్లో భూగర్భ జలాల కొరత తీవ్రంగా ఉందని, సుమారు 15 లక్షల పంపుసెట్లు ఉన్న ప్రాంతాల్లో నీళ్లు అడుగంటి మోటార్లు కాలిపోతుండటంతో రైతులు నష్టపోతున్నారని తెలిపారు. బోరుబావుల్లో నీటి లభ్యతపై రైతులకు అవగాహన కల్పిస్తూ వారిని అప్రమత్తం చేయాలని అధికారులను ఆదేశించారు. జలాశయాల్లో నీటిమట్టాలు తగ్గడంతో రానున్న రబీ సీజన్‌లో వరి బదులు ప్రత్యామ్నాయ పంటలు వేసేలా రైతులను ప్రోత్సహించాలన్నారు. గరిష్ఠ విద్యుత్ డిమాండ్ 20,018 మెగావాట్లకు చేరినప్పటికీ ముందస్తు ప్రణాళికలతో ముందుకెళ్తున్నామని తెలిపారు. రానున్న రోజుల్లో ప్రజలు, పశుపక్ష్యాదులకు తాగునీరు అందించడమే ప్రభుత్వ తొలి ప్రాధాన్యమని, రాజకీయాలకు అతీతంగా అందరూ కలిసి పనిచేసి ప్రజలకు భరోసా ఇవ్వాలని పిలుపునిచ్చారు.