యువతకు ఇచ్చిన హామీలు నెరవేర్చాలి - నల్ల బ్యాడ్జీలతో బీజేవైఎం నిరసన

సూర్య వాంకిడి:  యువతకు ఇచ్చిన హామీలను ప్రభుత్వం వెంటనే అమలు చేయాలని భారతీయ జనతా యువమోర్చా (బీజేవైఎం) నాయకులు డిమాండ్‌ చేశారు. ఈ మేరకు శనివారం వాంకిడి మండల కేంద్రంలోని శివాజీ చౌక్‌ వద్ద నల్ల బ్యాడ్జీలు ధరించి నిరసన చేపట్టారు. బీజేవైఎం కొమురం భీం జిల్లా అధ్యక్షుడు ఎలగతి సుచిత్‌ ఆధ్వర్యంలో కార్యక్రమం నిర్వహించారు.ఈ సందర్భంగా నాయకులు మాట్లాడుతూ.. రాష్ట్రంలో యూత్‌ డిక్లరేషన్‌ను అమలు చేయడంతో పాటు నిరుద్యోగ యువతకు హామీ ఇచ్చిన నిరుద్యోగ భృతిని వెంటనే చెల్లించాలని కోరారు. రాజీవ్‌ వికాస్‌ పథకాన్ని అమల్లోకి తీసుకురావాలని, యువతకు ఉద్యోగ, ఉపాధి అవకాశాలు కల్పించేందుకు ప్రభుత్వం ప్రత్యేక చర్యలు చేపట్టాలని డిమాండ్‌ చేశారు. హామీల అమలుపై స్పష్టమైన కార్యాచరణ ప్రకటించాలని అన్నారు.నిరుద్యోగ సమస్యను పరిష్కరించడంలో ప్రభుత్వం నిర్లక్ష్యం చేయకుండా యువతకు న్యాయం చేయాలని కోరారు. యువత భవిష్యత్తుకు భరోసా కల్పించేలా తక్షణ చర్యలు తీసుకోవాలని పేర్కొన్నారు.కార్యక్రమంలో బీజేపీ మండల ప్రధాన కార్యదర్శి రామగిరి విశాల్‌, శ్రీకాంత్‌, మండల ఉపాధ్యక్షుడు ఏకబిల్వం నరేందర్‌, బీజేవైఎం ఐటీ సెల్‌ కన్వీనర్‌ దుర్గం అక్షయ్‌కుమార్‌, బీజేవైఎం నాయకులు రేఖల గణేష్‌, చౌదరి కార్తీక్‌, పెందర్‌ సాయికిరణ్‌, గణేష్‌ తదితరులు పాల్గొన్నారు.