తాండూరులో పోలీసుల మెరుపు తనిఖీలు.. 42 వాహనాలు స్వాధీనం

తాండూరు,మేజర్ న్యూస్: వికారాబాద్ జిల్లా ఎస్పీ శ్రీమతి స్నేహ మెహ్రా, ఐపీఎస్ ఆదేశాల మేరకు తాండూరు సబ్ డివిజన్ డీఎస్పీ ఎన్. యాదయ్య ఆధ్వర్యంలో రాజీవ్ కాలనీలో పోలీసులు కమ్యూనిటీ కాంటాక్ట్ కార్యక్రమాన్ని నిర్వహించారు. ఈ కార్యక్రమంలో 95 మంది పోలీసు అధికారులు, సిబ్బంది పాల్గొని విస్తృత తనిఖీలు చేపట్టారు. సరైన పత్రాలు లేని 33 ద్విచక్ర వాహనాలు, 9 త్రిచక్ర వాహనాలు కలిపి మొత్తం 42 వాహనాలను స్వాధీనం చేసుకున్నారు. అలాగే పాపిలాన్ డివైస్ సహాయంతో ఒక అనుమానిత వ్యక్తిని గుర్తించారు.రాజీవ్ కాలనీకి చెందిన సుమారు 150 మంది ప్రజలు ఈ కార్యక్రమంలో పాల్గొన్నారు. ఈ సందర్భంగా పోలీసులు ప్రజలకు శాంతిభద్రతల పరిరక్షణ, వ్యక్తిగత భద్రత, నేరాల నివారణపై అవగాహన కల్పించారు. కాలనీల్లో అనుమానాస్పద వ్యక్తులు, కార్యకలాపాలు కనిపిస్తే వెంటనే పోలీసులకు సమాచారం అందించాలని సూచించారు. అవాంఛనీయ ఘటనలు జరగకుండా ప్రజలు అప్రమత్తంగా ఉండాలని కోరారు.ఈ సందర్భంగా డీఎస్పీ ఎన్. యాదయ్య మాట్లాడుతూ…. ప్రజల భద్రతను మరింత బలోపేతం చేయడం, నేరాలను నియంత్రించడం, అసాంఘిక కార్యకలాపాలకు అడ్డుకట్ట వేయడమే కమ్యూనిటీ కాంటాక్ట్ కార్యక్రమాల ప్రధాన ఉద్దేశమని తెలిపారు. వాహనదారులు తమ వాహనాలకు సంబంధించిన అవసరమైన పత్రాలను తప్పనిసరిగా కలిగి ఉండాలని సూచించారు. అనుమానాస్పద వ్యక్తులు లేదా కార్యకలాపాలు గమనించినప్పుడు ఆలస్యం చేయకుండా పోలీసులకు సమాచారం అందించాలని కోరారు.ప్రజలు పోలీసులకు సహకరిస్తూ నేరాల నియంత్రణలో భాగస్వాములు కావాలని పిలుపునిచ్చారు. ప్రజలకు, పోలీసులకు మధ్య సత్సంబంధాలను పెంపొందిస్తూ ప్రజల భాగస్వామ్యంతో శాంతిభద్రతల పరిరక్షణకు నిరంతరం కృషి చేస్తామని పేర్కొన్నారు.ఈ కార్యక్రమంలో తాండూరు టౌన్ ఇన్‌స్పెక్టర్ పరమేశ్వర్, కరణ్‌కోట్ సీఐ ప్రవీణ్ కుమార్, సబ్ డివిజన్ ఎస్‌ఐలు, పోలీసు సిబ్బంది తదితరులు పాల్గొన్నారు.