శ్రీరాంపూర్‌ ఏరియా వ్యాప్తంగా వైభవంగా నవరాత్రి ఉత్సవాలు
సూర్య నస్పూర్‌ :శ్రీరాంపూర్‌ ఏరియా గనులు, కార్యాలయాల్లో శరన్నవరాత్రి ఉత్సవాలు భక్తిశ్రద్ధలతో కొనసాగుతున్నాయి. ఇందులో భాగంగా శనివారం ఎస్ఆర్పీ ఓసీపీ, ఎస్ఆర్పీ 3&3ఏ గనుల్లో ప్రత్యేక పూజలు నిర్వహించారు. శ్రీరాంపూర్‌ ఓసీపీలో పోతరాజుల నృత్యాలు, డప్పు వాయిద్యాలు, ఆటపాటలతో ఊరేగింపుగా చేరుకొని అమ్మవారికి బోనాలు సమర్పించారు. ఏరియా జీఎం మునిగంటి శ్రీనివాస్‌ తొలుత క్వారీలో ఉత్పత్తిని పరిశీలించి, లక్ష్యాలకు అనుగుణంగా రోజువారీ ఉత్పత్తి సాధించాలని సూచించారు. అనంతరం అమ్మవారిని దర్శించుకొని వేడుకల్లో పాల్గొన్నారు. బోనాల సమర్పణ అనంతరం అన్నప్రసాద వితరణ చేపట్టారు.ఎస్ఆర్పీ 3&3ఏ గనిలో చండీ శాంతి హోమం, అన్నప్రసాద వితరణ నిర్వహించారు. జీఎం మునిగంటి శ్రీనివాస్‌ అమ్మవారిని దర్శించుకుని, ఆమె ఆశీస్సులతో శ్రీరాంపూర్‌ ఏరియా ఉత్పత్తి, ఉత్పాదకతతోపాటు అన్ని రంగాల్లో సింగరేణిలో అగ్రస్థానంలో నిలవాలని ఆకాంక్షించారు.
