ప్రాథమిక దశలోనే కుష్ఠువ్యాధిని గుర్తించాలి

సూర్యవాంకిడి:  కుష్ఠువ్యాధిని ప్రాథమిక దశలోనే గుర్తించి చికిత్స అందిస్తే పూర్తిగా నయం చేసే అవకాశం ఉందని ఆరోగ్య విస్తరణ అధికారి రవిదాస్ తెలిపారు. ఈ నెల 22 నుంచి నవంబర్‌ 4వ తేదీ వరకు నిర్వహించనున్న కుష్ఠువ్యాధి గుర్తింపు కార్యక్రమం (ఎల్‌సీడీసీ)పై వాంకిడి ప్రాథమిక ఆరోగ్య కేంద్రంలో ఏఎన్‌ఎంలు, ఆశా కార్యకర్తలకు అవగాహన, శిక్షణ కార్యక్రమం నిర్వహించారు.ఈ సందర్భంగా రవిదాస్ మాట్లాడుతూ.. ఇంటింటికీ వెళ్లి ప్రజలను పరిశీలించి చర్మంపై రాగి, తెలుపు రంగు మచ్చలు ఉన్నవారిని గుర్తించాలని సూచించారు. అనుమానిత లక్షణాలు కనిపించిన వారిని ప్రాథమిక ఆరోగ్య కేంద్రానికి తరలించి వైద్య పరీక్షలు చేయించాలని తెలిపారు. కుష్ఠువ్యాధిపై సమాజంలో ఉన్న అపోహలను తొలగించి, వ్యాధి లక్షణాలు ఉన్నవారు సకాలంలో వైద్యులను సంప్రదించేలా అవగాహన కల్పించాలని సూచించారు.

కార్యక్రమంలో ఏఎన్‌ఎంలు, ఆశా కార్యకర్తలు పాల్గొన్నారు.