మలక్‌పేట్ పోలీస్ స్టేషన్‌లో ఆయుధ పూజ..
హైదరాబాద్ మేజర్ న్యూస్ ::విజయదశమి (దసరా) పర్వదినాన్ని పురస్కరించుకుని హైదరాబాద్ నగర కమిషనరేట్ పరిధిలోని మలక్‌పేట్ పోలీస్ స్టేషన్‌లో ఆయుధ పూజ, వాహన పూజ కార్యక్రమాలను భక్తిశ్రద్ధలతో ఘనంగా నిర్వహించారు. మలక్‌పేట్ ఇన్‌స్పెక్టర్ ఆఫ్ పోలీస్ (సీఐ) వెంకటరెడ్డి ఆధ్వర్యంలో పోలీస్ స్టేషన్ ప్రాంగణంలో ఈ ప్రత్యేక పూజా కార్యక్రమాలు జరిగాయి. ఈ సందర్భంగా విధి నిర్వహణలో వినియోగించే పోలీస్ పెట్రోలింగ్ వాహనాలు, ఇంటర్‌సెప్టర్లు, ద్విచక్ర వాహనాలతో పాటు రక్షణ విభాగం ఆయుధాలకు శాస్త్రోక్తంగా అర్చకుల సమక్షంలో ప్రత్యేక పూజలు చేసి గుమ్మడికాయలు కొట్టారు.
పోలీస్ సిబ్బంది విధుల్లో ఎలాంటి ఆటంకాలు కలగకుండా, ప్రజలకు నిరంతరం అత్యున్నత స్థాయిలో శాంతిభద్రతల సేవలను అందించేలా జగన్మాత ఆశీస్సులు ఉండాలని ఈ సందర్భంగా సీఐ వెంకటరెడ్డి ఆకాంక్షించారు. సమాజంలో నేరాల నియంత్రణ, శాంతిభద్రతల పరిరక్షణే ధ్యేయంగా పోలీస్ యంత్రాంగం నిరంతరం అప్రమత్తంగా పనిచేస్తుందని, ప్రజలందరూ ఆయురారోగ్యాలు, సుఖసంతోషాలతో పండుగలను జరుపుకోవాలని ఆయన కోరారు. పోలీస్ స్టేషన్ ప్రాంగణాన్ని పూలతో అందంగా అలంకరించగా, ఈ పూజా కార్యక్రమంలో ఎస్సైలు, పోలీస్ సిబ్బంది, హోంగార్డులు పెద్ద సంఖ్యలో పాల్గొని తీర్థప్రసాదాలు స్వీకరించారు.
