మాల సంఘం ఆధ్వర్యంలో ఒక్కరోజు నిరాహార దీక్ష

సూర్య బాన్సువాడ: బాన్సువాడ పట్టణ కేంద్రంలో రోస్టర్ సవరణ, రోస్టర్ రద్దును కోరుతూ మాల సంఘం ఆధ్వర్యంలో శుక్రవారం ఒక్కరోజు నిరాహార దీక్ష చేపట్టారు. ఈ సందర్భంగా వారు మాట్లాడుతూ ఎస్సీ వర్గీకరణ వల్ల రోస్టర్ పాయింట్లలో మాల విద్యార్థులు, నిరుద్యోగులు, ఉద్యోగులకు తీవ్ర అన్యాయం జరుగుతోందన్నారు. రోస్టర్ ను సవరించాలి లేదా రద్దు చేసి నూతన రోస్టర్ విధానాన్ని తీసుకురావాలని తెలంగాణ ప్రభుత్వాన్ని డిమాండ్ చేశారు. కాంగ్రెస్ ప్రభుత్వం రావడానికి మాలలు అందరూ కాంగ్రెస్ కే ఓటు వేశారని సీఎం రేవంత్ రెడ్డి గుర్తించాలని, కాంగ్రెస్ ప్రభుత్వం ఇచ్చిన 20 నోటిఫికేషన్లలో దాదాపు 16 నోటిఫికేషన్లలో మాలలకు ఒక్క ఉద్యోగం కూడా రాలేదని ఆవేదన వ్యక్తం చేశారు. ఇదే విధానం కొనసాగితే రాబోయే ఎన్నికల్లో మాలలకు సపోర్ట్ చేసే పార్టీలకే ఓటు వేస్తామని హెచ్చరించారు. ఈ కార్యక్రమంలో మాల సంఘం అధ్యక్షులు మల్లూరు సాయిలు, గైని ప్రవీణ్ కుమార్, మాదిగ సంఘం రాష్ట్ర ఉపాధ్యక్షులు బంగారు మైసయ్య, బాన్సువాడ అంబేద్కర్ డివిజన్ అధ్యక్షులు ప్రశాంత్, మాజీ ఏఎంసీ చైర్మన్ నర్సింలు, బాన్సువాడ మండల అధ్యక్షులు పోతురాజు లింగం, బోగడమీద సాయిలు, మన్నే సాయిలు, శివశంకర్, మొగులజీ తదితరులు పాల్గొన్నారు.