పెళ్లికి ముందే బిడ్డ కావాలనే కోరిక ఉండేది.. నటి అనుపమ పరమేశ్వరన్ సంచలన వ్యాఖ్యలు

సూర్య ఎంటర్‌టైన్‌మెంట్ డెస్క్: టాలీవుడ్ టాలెంటెడ్ నటి అనుపమ పరమేశ్వరన్ తన తాజా సినిమా ప్రమోషన్ కార్యక్రమంలో భాగంగా వివాహం మరియు కుటుంబ బంధాలపై చేసిన వ్యాఖ్యలు ప్రస్తుతం సినీ వర్గాల్లో తీవ్ర చర్చనీయాంశంగా మారాయి. సమాజంలో వివాహం, మహిళల పాత్ర అలాగే పిల్లల పెంపకంపై ఇప్పటికీ కొనసాగుతున్న కొన్ని మూస ధోరణులను ఆమె ప్రశ్నిస్తూ కుండబద్దలు కొట్టినట్లు మాట్లాడారు. తనకు పెళ్లికి ముందే ఒక బిడ్డను కనాలని లేదా దత్తత తీసుకోవాలనే బలమైన కోరిక ఉండేదని ఆమె పేర్కొనడం అందరి దృష్టిని ఆకర్షించింది.

పెళ్లి కాకపోయినా పర్వాలేదు కానీ పిల్లలను కనవచ్చు అనే అంశంపై స్పందిస్తూ, భవిష్యత్తులో తనకు వివాహం జరుగుతుందో లేదో తెలియకపోయినా ఒక పాపను లేదా బాబును పెంచుకోవాలనే ఆలోచన తనకు ఉండేదని అనుపమ వెల్లడించారు. అడాప్షన్ లేదా ఐవీఎఫ్ వంటి ఆధునిక పద్ధతుల ద్వారా సంతానాన్ని పొందడం సాధ్యమేనని ఆమె స్పష్టం చేశారు. కేవలం సాంప్రదాయ కట్టుబాట్లకు మాత్రమే పరిమితం కాకుండా మహిళలు వ్యక్తిగత జీవితంలోనూ స్వతంత్ర నిర్ణయాలు తీసుకోవచ్చని ఆమె తన అభిప్రాయాలను నిర్మొహమాటంగా పంచుకున్నారు.

అదేవిధంగా దాంపత్య జీవితంలో భార్యాభర్తల మధ్య సమానత్వం ఎంతైనా అవసరమని అనుపమ అభిప్రాయపడ్డారు. వివాహం చేసుకునేది కేవలం ఇళ్లలో పనులు చేయడానికి ఉచితంగా వచ్చే వ్యక్తి కోసం కాదని, ఆడపిల్లల బాధ్యతలను కేవలం వంటింటికే పరిమితం చేయకూడదని ఆమె హితవు పలికారు. రోజంతా బయట కష్టపడి అలిసిపోయి ఇంటికి వచ్చాక మహిళలు మాత్రమే వంటగదిలో పని చేయడం, పురుషులు విశ్రాంతి తీసుకోవడం సరైన పద్ధతి కాదని పేర్కొన్నారు. ఇంట్లోని పనులను ఇద్దరూ సమానంగా పంచుకుంటూ ఒకరికొకరు తోడుగా నిలిచే నిజమైన భాగస్వామ్యం ఉండాలని ఆమె సూచించారు.

Also Read: పండగ పూట పస్తులేనా? కార్మికుల ఆవేదన!