సూర్య జైనూర్ : సిర్పూర్ (యు) మండలంలోని రాఘపూర్ గ్రామానికి చెందిన గర్భిణీ పెందూర్ గంగాదేవి 108 అంబులెన్స్‌లో ఆడ శిశువుకు జన్మనిచ్చింది. తల్లీబిడ్డ క్షేమంగా ఉన్నారు.వివరాల్లోకి వెళ్తే.. గంగాదేవికి పురిటి నొప్పులు రావడంతో కుటుంబ సభ్యులు సిర్పూర్ (యు) మండల కేంద్రంలోని ప్రభుత్వ ఆసుపత్రిలో చేర్పించారు. అక్కడి వైద్య సిబ్బంది సూచన మేరకు మెరుగైన ప్రసూతి వైద్యం కోసం ఉట్నూర్ ఆసుపత్రికి రెఫర్ చేశారు. దీంతో ఆమెను 108 అంబులెన్స్‌లో ఉట్నూర్‌కు తరలిస్తుండగా మార్గమధ్యంలో పురిటి నొప్పులు అధికమయ్యాయి.దీంతో అప్రమత్తమైన 108 అంబులెన్స్ ఈఎంటీ రవి, పైలెట్ దయాకర్ అత్యవసర పరిస్థితుల్లో తగిన జాగ్రత్తలు తీసుకుంటూ అంబులెన్స్‌లోనే ప్రసూతి నిర్వహించారు. గంగాదేవి మొదటి కాన్పులో ఆడ శిశువుకు జన్మనిచ్చినట్లు వారు తెలిపారు.అనంతరం తల్లీబిడ్డను ఉట్నూర్ ఆసుపత్రిలో చేర్పించగా, ఇద్దరూ క్షేమంగా ఉన్నట్లు వెల్లడించారు. అత్యవసర సమయంలో సమయస్ఫూర్తితో స్పందించి సురక్షితంగా ప్రసవం చేయడంపై గంగాదేవి కుటుంబ సభ్యులు 108 సిబ్బందికి కృతజ్ఞతలు తెలిపారు.
