తమిళనాడులో విస్తారంగా వర్షాలు

ఎండల నుండి ప్రజలకు ఉపశమనం, 17 జిల్లాలకు యెల్లో అలర్ట్
చెన్నై: తమిళనాడులోని పలు జిల్లాల్లో శనివారం రాత్రి నుండి బలమైన గాలులతో కూడిన భారీ వర్షాలు కురవడంతో భానుడి తీవ్రత నుండి ప్రజలకు గొప్ప ఉపశమనం లభించింది. పెరంబలూర్, వెల్లూర్, విరుదునగర్, దిండిగల్, కోయంబత్తూర్, కొడైకెనాల్ మరియు ఊటీ తదితర ప్రాంతాల్లో విస్తారంగా వర్షాలు నమోదయ్యాయి. ఈ వర్షాలు సాంబ వరి సాగుకు పొలాలను సిద్ధం చేసుకుంటున్న రైతులకు ఎంతో ఊరటనిచ్చాయి.

పెర్నాంబుట్‌లో కురిసిన భారీ వర్షం కారణంగా తమిళనాడును ఆంధ్రప్రదేశ్, కర్ణాటకలతో కలిపే ప్రధాన రాష్ట్ర రహదారిపై నీరు నిలిచిపోవడంతో రవాణాకు తీవ్ర అంతరాయం ఏర్పడింది.

కాగా, ఆదివారం నాడు నీలగిరి, కోయంబత్తూర్, తేని, తిరునెల్వేలి, మదురై, వెల్లూర్ సహా 17 జిల్లాల్లో ఓ మోస్తరు వర్షాలు కురిసే అవకాశం ఉందని ప్రాంతీయ వాతావరణ కేంద్రం వెల్లడించింది. రాజధాని చెన్నై పరిసర ప్రాంతాల్లో సాయంత్రం వేళల్లో వర్షం కురిసే అవకాశం ఉండగా, సెప్టెంబర్ 15, 16 తేదీల్లో నీలగిరి, కోయంబత్తూర్ జిల్లాల్లో భారీ వర్షాలు నమోదు కానున్నాయని హెచ్చరించింది.