వికసిత్ భారత్ కోసం ఉన్నత స్థాయి కమిటీని ఏర్పాటు చేసిన కేంద్ర ప్రభుత్వం

సూర్య జాతీయ డెస్క్: వికసిత్ భారత్ 2047 లక్ష సాధన దిశగా దేశీయ బ్యాంకింగ్ వ్యవస్థలో విప్లవాత్మక మార్పులు తీసుకువచ్చేందుకు కేంద్ర ప్రభుత్వం అత్యున్నత స్థాయి కమిటీని ఏర్పాటు చేసింది. కేంద్ర ఆర్థిక శాఖ మంత్రి నిర్మలా సీతారామన్ యూనియన్ బడ్జెట్ ప్రసంగంలో చేసిన ప్రకటనకు అనుగుణంగా రూపుదిద్దుకున్న ఈ ఉన్నత స్థాయి కమిటీ భారత బ్యాంకింగ్ రంగాన్ని అంతర్జాతీయ స్థాయికి తీసుకెళ్లడంతో పాటు వ్యవస్థాగత, చట్టబద్ధమైన మరియు నియంత్రణ సంస్కరణలను సిఫార్సు చేయనుంది. కేంద్ర నిఘా విభాగం మాజీ కమిషనర్ సురేష్ ఎన్ పటేల్ అధ్యక్షతన ఆరుగురు సభ్యులతో కూడిన ఈ ప్యానెల్ రాబోయే ఆరు నెలల కాలంలో తన అధ్యయనాన్ని పూర్తి చేసి నివేదికను సమర్పించనుంది.

ఈ ఉన్నత స్థాయి బ్యాంకింగ్ కమిటీలో రిజర్వ్ బ్యాంక్ ఆఫ్ ఇండియా డిప్యూటీ గవర్నర్ శిరీష్ చంద్ర ముర్ము, ఇండియన్ బ్యాంక్ మాజీ మేనేజింగ్ డైరెక్టర్ పద్మజా చుండూరు, ఆర్‌బీఐ మాజీ డిప్యూటీ గవర్నర్ ఎన్ ఎస్ విశ్వనాథన్ ప్రతినిధులుగా వ్యవహరిస్తున్నారు. ఆర్థిక సేవల శాఖకు చెందిన జాయింట్ సెక్రటరీ ఈ కమిటీ మెంబర్ కార్యదర్శిగా బాధ్యతలు నిర్వర్తిస్తారు. అంతర్జాతీయ ఉత్తమ ప్రామాణికాలతో పోల్చుతూ భారతీయ బ్యాంకింగ్ నిబంధనలను సమీక్షించడం, ప్రాధాన్యతా రంగాల రుణాలు, రీజినల్ రూరల్ బ్యాంకులు మరియు సహకార బ్యాంకుల పురోగతిని వేగవంతం చేయడం ఈ ప్యానెల్ ప్రధాన బాధ్యతగా నిర్ణయించారు.

ఆధునిక డిజిటల్ యుగానికి అనుగుణంగా బ్యాంకింగ్ రంగంలో ఆర్టిఫిషియల్ ఇంటెలిజెన్స్, డిజిటల్ నూతన సాంకేతికతలను పెంచడంతో పాటు సైబర్ రక్షణ చర్యలను పటిష్టం చేసేందుకు ఈ ప్యానెల్ స్పష్టమైన కార్యాచరణను సిద్ధం చేస్తుంది. వ్యాపార రంగానికి అవసరమైన పెట్టుబడి వ్యయాన్ని తగ్గించడం, ప్రైవేట్ పెట్టుబడులను ఆకర్షించడం మరియు బ్యాంకింగ్ సిబ్బంది నైపుణ్యాలను పెంపొందించడం ద్వారా భవిష్యత్ అవసరాలకు తగ్గట్టుగా బ్యాంకింగ్ వ్యవస్థను సిద్ధం చేయడానికి అవసరమైన సూచనలను ప్రభుత్వం ఈ కమిటీ ద్వారా పొందనుంది.

ఆర్థిక స్థిరత్వం, అందరికీ ఆర్థిక సేవలు అందుబాటులోకి తేవడం మరియు వినియోగదారుల ప్రయోజనాలను రక్షించడమే ధ్యేయంగా కేంద్ర ప్రభుత్వం ఈ చర్యలు చేపట్టింది. సుదీర్ఘ మూలధన అవసరాలను తీర్చడం ద్వారా పారిశ్రామిక, ఆర్థిక ప్రగతికి ఊతమివ్వడమే కాకుండా గ్రామీణ స్థాయి వరకు క్రెడిట్ డెలివరీని మరింత సులభతరం చేసేలా నూతన విధానాలను ఈ కమిటీ రూపొందించనుంది.