సముద్రంలో భారత భద్రతా వలయం పటిష్టం: మూసుకుపోతున్న హాజీ సలీమ్ డ్రగ్స్ మార్గాలు.. నార్కో-సిండికేట్‌కు కోలుకోలేని దెబ్బ!
సూర్య డిఫెన్స్ & క్రైమ్ డెస్క్: అంతర్జాతీయంగా వేల కోట్ల రూపాయల మాదకద్రవ్యాల దందాను నడిపిస్తున్న అండర్‌వరల్డ్ నార్కో కింగ్‌పిన్ హాజీ సలీమ్ సిండికేట్‌కు భారత రక్షణ బలగాలు వరుస ఎదురుదెబ్బలు తగులుతున్నాయి. అరేబియా సముద్రం, హిందూ మహాసముద్ర జలాల్లో భారత నౌకాదళం , ఇండియన్ కోస్ట్ గార్డ్ , నార్కోటిక్స్ కంట్రోల్ బ్యూరో మరియు తీరప్రాంత ఏటీఎస్ విభాగాలు సంయుక్తంగా నిఘా వలయాన్ని విస్తరించడంతో స్మగ్లర్ల ప్రధాన రవాణా మార్గాలు మూసుకుపోతున్నాయి.
గుజరాత్ తీరంలో భద్రత అత్యంత కఠినతరం కావడంతో లక్షద్వీప్, కేరళ, తమిళనాడు మార్గాల వైపు మళ్లిన సలీమ్ ముఠా పడవలను సైతం లోతైన సముద్రంలోనే (Deep Sea Interception) బలగాలు పక్కా సమాచారంతో అడ్డగిస్తున్నాయి.
ముఖ్యాంశాలు: ‘ఆపరేషన్ సాగర్ మంథన్’తో బిగుస్తున్న ఉచ్చు
లక్షద్వీప్ వద్ద భారీ వేట:ఇటీవల లక్షద్వీప్ సముద్ర జలాల్లో ఇరాన్ బోటు ‘ఆజాద్’ను చుట్టుముట్టి సుమారు రూ. 3,000 కోట్ల విలువైన 526 కిలోల హెరాయిన్, మెథాంఫెటమిన్ డ్రగ్స్‌ను స్వాధీనం చేసుకోవడం ద్వారా హాజీ సలీమ్ సరికొత్త దక్షిణ భారత మార్గాన్ని కూడా నిఘా సంస్థలు బహిర్గతం చేశాయి.
టెక్నాలజీతో నిఘా – శాటిలైట్ కమ్యూనికేషన్లపై నిఘా:స్మగ్లర్లు అంతర్జాతీయ జలాల్లో ‘మదర్ షిప్స్’ను ఉంచి, చిన్న బోట్ల ద్వారా సరుకును చేరవేసేందుకు స్టార్‌లింక్, శాటిలైట్ ఫోన్లు వంటి సాంకేతికతలను ఉపయోగిస్తున్నప్పటికీ.. కోస్ట్ గార్డ్ రాడార్ నెట్‌వర్క్, డ్రోన్ల సహాయంతో ఆ కదలికలను ముందస్తుగానే గుర్తిస్తోంది.
'డెత్ క్రెసెంట్' నార్కో పైప్‌‌లైన్‌కు గండి:ఆఫ్ఘనిస్తాన్, పాకిస్తాన్, ఇరాన్ దేశాల మీదుగా సముద్ర మార్గంలో భారత్‌లోకి ప్రవేశించే నార్కో-టెర్రర్ సిండికేట్‌లో 70 శాతానికి పైగా హాజీ సలీమ్ నెట్‌వర్కే నడుపుతోంది. ఈ సిండికేట్ కార్టెల్ మార్గాలపై కోస్ట్ గార్డ్ పహారా పెంచడంతో సరకు రవాణా చేయడానికి మార్గాలు లేక డ్రగ్స్ ముఠాలు ఉక్కిరిబిక్కిరి అవుతున్నాయి.
తీర భద్రతను శత్రుదుర్భేద్యంగా మార్చడంతో పాటు ఇతర అంతర్జాతీయ ఇంటెలిజెన్స్ ఏజెన్సీలతో రియల్-టైమ్ సమాచార మార్పిడిని కొనసాగిస్తుండటంతో, భారత ప్రాదేశిక జలాల్లో నార్కోటిక్స్ సిండికేట్ల విస్తరణకు అడ్డుకట్ట పడుతోంది.
