డిసెంబర్లో ప్రధాని మోదీ కెనడా పర్యటన
చారిత్రక వర్తక ఒప్పందంపై సంతకం చేసే అవకాశం
సూర్య జాతీయ డెస్క్: భారత ప్రధాని నరేంద్ర మోదీ ఈ ఏడాది డిసెంబర్ నెలలో కెనడాలో పర్యటించే అవకాశం ఉందని అంతర్జాతీయ కథనాలు స్పష్టం చేస్తున్నాయి. ఇరు దేశాల మధ్య ప్రతిపాదిత స్వేచ్ఛా వర్తక ఒప్పందంపై సంతకం చేసేందుకే ఈ పర్యటన ఖరారవుతున్నట్లు సమాచారం. నవంబర్ నాటికి చర్చలు పూర్తి కావచ్చని, ఆ వెంటనే డిసెంబర్లో ఒప్పంద ప్రక్రియ ముగిసేలా ప్రణాళికలు సిద్ధమవుతున్నాయని కెనడాలోని భారత హైకమిషనర్ దినేష్ పట్నాయక్ వ్యాఖ్యానించినట్లు గ్లోబ్ అండ్ మెయిల్ నివేదించింది. ప్రధాని మోదీ పర్యటనపై కెనడా ప్రధాన మంత్రి మార్క్ కార్నీ కూడా సానుకూల సంకేతాలు ఇవ్వడంతో ద్వైపాక్షిక సంబంధాల్లో కీలక పురోగతి కనిపిస్తోంది.
భారత్ మరియు కెనడాల మధ్య వాణిజ్య భాగస్వామ్యాన్ని మరింత బలోపేతం చేసేందుకు స్వేచ్ఛా వర్తక ఒప్పంద చర్చలు వేగంగా సాగుతున్నాయి. వ్యాపార ప్రతిబంధకాలను తొలగించి, వ్యవసాయం, సాంకేతికత, శక్తి మరియు రక్షణ రంగ్ వ్యాపారాన్ని విస్తరించడమే లక్ష్యంగా ఇరు దేశాలు ముందుకు సాగుతున్నాయి. గతంలో ఉత్పన్నమైన దౌత్యపరమైన విభేదాలను అధిగమించి, వ్యాపార మరియు ఆర్థిక సంబంధాలను తిరిగి గాడిలో పెట్టేందుకు ఇరు దేశాల ప్రతినిధులు చురుగ్గా వ్యవహరిస్తున్నారు.
ఈ ఉమ్మడి ఒప్పందం ద్వారా ఇరు దేశాల మధ్య ఏటా బిలియన్ డాలర్ల మేర జరిగే వాణిజ్యం రెట్టింపు అయ్యే అవకాశం ఉందని విశ్లేషకులు భావిస్తున్నారు. అంతర్జాతీయ ఆర్థిక పరిస్థితులు మరియు మారిన ప్రపంచ భౌగోళిక రాజకీయాల నేపథ్యంలో భారత్తో విస్తృత వ్యాపార సంబంధాలు నెరపడం కెనడాకు అత్యంత ప్రాధాన్య అంశంగా మారింది. ప్రధాని మోదీ కెనడా పర్యటన సమయంలో కేవలం వర్తక ఒప్పందమే కాకుండా రక్షణ మరియు అంతరిక్ష రంగాల్లో పలు కీలక అవగాహన ఒప్పందాలపై కూడా సంతకాలు జరిగే వీలుంది.
ఇరు దేశాల మధ్య దౌత్య బంధం తిరిగి పుంజుకోవడం ద్వారా ఆర్థిక సహకారం మరింత పెరగనుంది. విద్యా, పరిశోధన, సాంకేతిక మరియు ఉద్యోగ అవకాశాల రంగాల్లో కూడా సానుకూల ప్రభావం పడుతుందని నిపుణులు భావిస్తున్నారు. డిసెంబర్లో జరగనున్న ఈ పర్యటన రెండు దేశాల ఆర్థిక వ్యవస్థలకు సరికొత్త పుంతలు తొక్కించడమే కాకుండా దౌత్య సంబంధాలలో నూతన అధ్యాయానికి పునాది వేస్తుందని ఆశిస్తున్నారు.
