దౌత్య మార్గంలో రష్యా-ఉక్రెయిన్ వార్
న్యూయార్క్లో ల్యావ్రోవ్తో భేటీ కానున్న అమెరికా విదేశాంగ మంత్రి మార్కో రూబియో
సూర్య అంతర్జాతీయ డెస్క్: రష్యా-ఉక్రెయిన్ యుద్ధానికి ముగింపు పలికేందుకు దౌత్యపరమైన ప్రయత్నాలను అమెరికా ముమ్మరం చేసింది. ఐక్యరాజ్యసమితి సర్వసభ్య సమావేశాల పక్కన అమెరికా విదేశాంగ మంత్రి మార్కో రూబియో మరియు రష్యా విదేశాంగ మంత్రి సెర్గీ ల్యావ్రోవ్ బుధవారం ఉదయం న్యూయార్క్ నగరంలో భేటీ కానున్నారు. ఈ కీలక భేటీ గురించి అమెరికా స్టేట్ డిపార్ట్మెంట్ అధికారికంగా ప్రకటన విడుదల చేసింది. ఇప్పటికే ఉక్రెయిన్ అధ్యక్షుడు వ్లాదిమిర్ జెలెన్స్కీతో అమెరికా అధ్యక్షుడు డోనాల్డ్ ట్రంప్ ఐరాస ప్రధాన కార్యాలయంలో సమావేశమై యుద్ద విరమణ ప్రతిపాదనలపై చర్చలు జరిపిన నేపథ్యంలో ఈ దౌత్యపరమైన ముఖాముఖి అత్యంత ప్రాధాన్యతను సంతరించుకుంది.
ఉక్రెయిన్లో ఇంధన రంగానికి చెందిన మౌలిక వసతులపై దాడులను నిలిపివేస్తూ ద్వైపాక్షిక కాల్పుల విరమణ అమలు చేయడంపై డోనాల్డ్ ట్రంప్తో మాట్లాడినట్లు జెలెన్స్కీ వెల్లడించారు. అంతకుముందు రష్యా, ఉక్రెయిన్ ఇరు దేశాలు ఇంధన మౌలిక సదుపాయాలపై దాడులు చేయకూడదని ఒప్పందానికి వచ్చినట్లు వార్తలు వచ్చినప్పటికీ, మరుసటి రోజే కైవ్లోని పెట్రోల్ బంకులపై రష్యా, సామారాలోని రష్యన్ ఆయిల్ రిఫైనరీపై ఉక్రెయిన్ డ్రోన్ దాడులతో పరస్పరం విరుచుకుపడ్డాయి. చర్చలు జరుగుతున్నంత మాత్రాన క్షేత్రస్థాయిలో దాడులు ఆపేది లేదని రష్యా ఇప్పటికే స్పష్టం చేసిన పరిణామాల మధ్య రూబియో, ల్యావ్రోవ్ భేటీ ప్రాధాన్యత సంతరించుకుంది.
రష్యా, అమెరికా విదేశాంగ మంత్రుల భేటీ ద్వారా ఇరు దేశాల నడుమ దౌత్య మార్గాలు తెరిచి ఉంచడంతో పాటు ఉక్రెయిన్ వివాద పరిష్కారానికి సాధ్యమైన మార్గాలను అన్వేషించడమే ప్రధాన లక్ష్యంగా కనిపిస్తోంది. శనివారం ఐక్యరాజ్యసమితి సర్వసభ్య సమావేశంలో ల్యావ్రోవ్ ప్రసంగించనుండగా, అంతకంటే ముందే జరుగుతున్న ఈ సమావేశం ఇరు దేశాల దౌత్య సంబంధాలలో మరియు ప్రాంతీయ భద్రతా వ్యవహారాల్లో ఎంతవరకు పురోగతికి దోహదపడుతుందోనని అంతర్జాతీయ నిపుణులు ఉత్కంఠగా గమనిస్తున్నారు.
