బీజేపీలో భారీ సంస్థాగత మార్పులు: వివిధ రాష్ట్రాలకు ప్రధాన కార్యదర్శుల నియామకం.. జాతీయ అధ్యక్షుడు నితిన్ నబీన్ ప్రకటన

సూర్య జాతీయ డెస్క్: భారతీయ జనతా పార్టీ (బీజేపీ) సంస్థాగత యంత్రాంగాన్ని మరింత పటిష్టం చేసే దిశగా జాతీయ అధ్యక్షుడు నితిన్ నబీన్ కీలక నిర్ణయం తీసుకున్నారు. దేశవ్యాప్తంగా వివిధ రాష్ట్రాలు, కేంద్రపాలిత ప్రాంతాల్లో పార్టీ సంస్థాగత ప్రధాన కార్యదర్శులు (ఆర్గనైజేషనల్ జనరల్ సెక్రటరీలు), సహ-ప్రధాన కార్యదర్శులు మరియు ప్రాంతీయ సంఘటక్‌ల బాధ్యతలను ఖరారు చేస్తూ 24 మంది కీలక నాయకులతో కూడిన అధికారిక నియామక జాబితాను గురువారం విడుదల చేశారు. ఈ నియామకాలు తక్షణమే అమల్లోకి వస్తాయని పార్టీ కేంద్ర కార్యాలయం ప్రకటించింది. జాతీయ స్థాయిలో మరియు రాష్ట్రాల స్థాయిలో సమన్వయాన్ని వేగవంతం చేసి పార్టీ బలోపేతానికి ఈ నూతన నాయకత్వం కృషి చేయనుంది.

తాజా నియామకాల్లో భాగంగా జాతీయ సంయుక్త ప్రధాన కార్యదర్శి (సంస్థాగత)గా శివప్రకాశ్‌కు ఆంధ్రప్రదేశ్, మహారాష్ట్ర, మధ్యప్రదేశ్, ఛత్తీస్‌గఢ్, గోవా బాధ్యతలను కేటాయించగా, ఆయన కేంద్ర కార్యాలయం ముంబైగా నిర్ణయించారు. మరో సీనియర్ నేత సౌదాన్ సింగ్‌కు బీహార్, జార్ఖండ్, ఒడిశా, పశ్చిమ బెంగాల్ రాష్ట్రాల పర్యవేక్షణ బాధ్యతలు అప్పగించారు. తెలుగు రాష్ట్రాల విషయానికి వస్తే ఆంధ్రప్రదేశ్, తెలంగాణ రాష్ట్రాల బీజేపీ సంస్థాగత ప్రధాన కార్యదర్శిగా మధుకర్‌ను నియమించగా, తెలంగాణ రాష్ట్ర సంయుక్త ప్రధాన కార్యదర్శి (సంస్థాగత) బాధ్యతలను దాశరథ్‌కు కేటాయించారు. అలాగే తెలుగు రాష్ట్రాల నేత మంత్రి శ్రీనివాసులుకు పంజాబ్, చండీగఢ్ రాష్ట్రాల సంస్థాగత ప్రధాన కార్యదర్శిగా బాధ్యతలు అప్పగించారు.

ఇతర రాష్ట్రాల్లో పరిశీలిస్తే ఉత్తరప్రదేశ్ సంస్థాగత ప్రధాన కార్యదర్శిగా ధర్మపాల్, పశ్చిమ బెంగాల్ బాధ్యతలను అమితాబ్ చక్రవర్తి, మధ్యప్రదేశ్‌కు చంద్రశేఖర్, ఛత్తీస్‌గఢ్‌కు కర్మవీర్, ఒడిశాకు మానస్ మొహంతి, ఢిల్లీ-హర్యానా బాధ్యతలను పవన్ రాణా, బీహార్‌కు భిఖుభాయ్ దల్సానియా, జార్ఖండ్‌కు పవన్ సాయి, హిమాచల్ ప్రదేశ్‌కు సిద్ధార్థన్, గుజరాత్‌కు రత్నాకర్ నియమితులయ్యారు. వీటితో పాటు బ్రజ్ క్షేత్రం, బీహార్‌లోని కోసీ-పూర్ణియా ప్రాంతాలకు ప్రత్యేక సంఘటక్‌లను నియమించారు. రాబోయే అసెంబ్లీ మరియు స్థానిక సంస్థల ఎన్నికలను దృష్టిలో ఉంచుకుని బూత్ స్థాయి నుంచి రాష్ట్ర స్థాయి వరకు కేడర్‌ను సమాయత్తం చేయడమే లక్ష్యంగా బీజేపీ అధిష్ఠానం ఈ భారీ ప్రక్షాళన చేపట్టింది.