యూఎస్ లేబర్ డిపార్ట్‌మెంట్ నిర్ణయంపై టీసీఎస్ స్పష్టత
అమెరికాలో PERM (ప్రోగ్రామ్ ఫర్ ఎలక్ట్రానిక్ రివ్యూ మేనేజ్‌మెంట్) లేబర్ సర్టిఫికేషన్ దరఖాస్తులను నిలిపివేస్తూ యూఎస్ డిపార్ట్‌మెంట్ ఆఫ్ లేబర్ ఇటీవల తీసుకున్న నిర్ణయంపై భారతీయ ఐటీ దిగ్గజం టాటా కన్సల్టెన్సీ సర్వీసెస్ (TCS) స్పష్టతనిచ్చింది. యూఎస్ కార్మిక శాఖ ఇచ్చిన ఆదేశాలను పూర్తిగా పాటిస్తామని ప్రకటించిన సంస్థ, ఈ నిర్ణయం వల్ల తమ వ్యాపార విధానాలపై గానీ, రోజువారీ కార్యకలాపాలపై గానీ ఎటువంటి ప్రతికూల ప్రభావం ఉండదని తేల్చిచెప్పింది. అమెరికాలోని తమ ఆఫీసులు మరియు ప్రాజెక్ట్‌లలో ఇప్పటికే స్థానిక నిపుణులకే (అమెరికన్ పౌరులు మరియు శాశ్వత నివాసితులు) ఎక్కువ ప్రాధాన్యత ఇస్తున్నామని, చివరికి అక్కడ నిర్వహించే విశ్వవిద్యాలయాల క్యాంపస్ రిక్రూట్‌మెంట్‌లలో కూడా స్థానిక అభ్యర్థులకే మొదటి పీఠం వేస్తున్నామని సంస్థ వెల్లడించింది.
కాగా, యూఎస్ కంపెనీలు విదేశీ ఉద్యోగులకు గ్రీన్ కార్డ్ స్పాన్సర్ చేయడానికి ముందు యూఎస్ కార్మిక శాఖ నుండి పొందే అత్యంత కీలకమైన మొదటి దశ అనుమతినే ఈ PERM లేబర్ సర్టిఫికేషన్‌గా వ్యవహరిస్తారు. తమ వద్ద ఖాళీగా ఉన్న ఉద్యోగానికి సరిపడా అమెరికన్ స్థానిక అభ్యర్థులు లభించడం లేదని నిరూపించడమే ఈ ప్రక్రియ యొక్క ప్రధాన లక్ష్యం. ఈ ప్రక్రియ నిలిచిపోవడం వల్ల H-1B వీసాలపై అమెరికాలో పనిచేస్తున్న వేలాది మంది భారతీయ ఐటీ ఉద్యోగుల గ్రీన్ కార్డ్ ప్రక్రియ మరింత ఆలస్యమయ్యే అవకాశం ఉంది. అయితే, తమ కంపెనీ గడిచిన కొన్ని ఏళ్లుగా స్థానిక రిక్రూట్‌మెంట్‌లపైనే ఎక్కువగా దృష్టి సారించినందున, ఈ PERM సస్పెన్షన్ వల్ల తమ సంస్థపై ప్రభావం దాదాపు శూన్యమని టీసీఎస్ యాజమాన్యం స్పష్టం చేసింది.
