నేపాల్ మంచు తుఫానులో చిక్కుకున్న భారతీయ పర్యాటకులు సురక్షితం
సూర్య అంతర్జాతీయ డెస్క్: నేపాల్‌లోని అత్యంత ఎత్తైన, మారుమూల హిమాలయ ప్రాంతమైన అప్పర్ డోల్పా జిల్లాలో భారీ హిమపాతం కారణంగా చిక్కుకుపోయిన ఆరుగురు భారతీయ పర్యాటకులను అక్కడి రెస్క్యూ బృందాలు హెలికాప్టర్ సహాయంతో సురక్షితంగా రక్షించాయి. షే-ఫోక్సుందో నేషనల్ పార్క్ పరిధిలోని షే-ఫోక్సుందో సరస్సును సందర్శించి తిరిగి వస్తుండగా నుమ్లా మరియు వాగ్లా పాస్ వద్ద ఒక్కసారిగా మంచు తుఫాను ముసురుకోవడంతో వీరంతా అక్కడే చిక్కుకుపోయారు. పర్యాటకులు అందించిన అత్యవసర సమాచారంతో అప్రమత్తమైన నేపాల్ రక్షణ దళాలు, జిల్లా యంత్రాంగం వెంటనే ప్రత్యేక హెలికాప్టర్ ఆపరేషన్ చేపట్టి వారిని దునాయ్ ప్రాంతానికి తరలించాయి.
మౌమితా హల్దార్, పియాలీ కోలే, జాజాలా త్రివేద్ కుమార్, ఆదిత్య సిన్హా, డిప్లినా బిస్వాస్ మరియు రాజేష్ డే అనే ఆరుగురు భారతీయ పర్యాటకులు నేపాల్ కొండ ప్రాంతాలలో ట్రెకింగ్ నిమిత్తం వెళ్లారు. అయితే శనివారం నుంచి ప్రదేశంలో తీవ్ర హిమపాతం కురవడంతో రాకపోకలకు మార్గాలు పూర్తిగా మూసుకుపోయాయి. రవాణా వ్యవస్థ నిలిచిపోవడమే కాకుండా ఉష్ణోగ్రతలు సున్నా డిగ్రీల కంటే దిగువకు పడిపోవడంతో పర్యాటకులు తీవ్రమైన చలిలో నరకయాతన అనుభవించారు. ఈ క్రమంలో భద్రతా బలగాలు శ్రమించి చేపట్టిన ఎయిర్‌లిఫ్ట్ ఆపరేషన్ విజయవంతం కావడంతో పర్యాటకులతో పాటు వారి కుటుంబ సభ్యులు తీవ్ర ఊరట చెందారు.
డోల్పా జిల్లా పరిపాలనాధికారులు వెల్లడించిన వివరాల ప్రకారం రక్షించబడిన పర్యాటకులందరి ఆరోగ్య పరిస్థితి ప్రస్తుతం నిలకడగా ఉందని, వారికి అవసరమైన వైద్య పరీక్షలు మరియు ప్రాథమిక చికిత్స అందించినట్లు తెలిపారు. మారుతున్న ప్రతికూల వాతావరణ పరిస్థితుల దృష్ట్యా ఎత్తైన హిమాలయ ప్రాంతాల్లో ట్రెకింగ్ చేసేవారు మరియు విదేశీ పర్యాటకులు ముందస్తు జాగ్రత్తలు తీసుకోవాలని, వాతావరణ శాఖ హెచ్చరికలను గమనిస్తూ అప్రమత్తంగా ఉండాలని స్థానిక యంత్రాంగం కోరింది. ప్రతికూల వాతావరణంలో సైతం సమర్థవంతంగా రెస్క్యూ ఆపరేషన్ నిర్వహించి భారత పర్యాటకుల ప్రాణాలు కాపాడిన నేపాల్ సెక్యూరిటీ ఏజెన్సీలను పలువురు అభినందించారు.
