కుండపోతతో అల్లకల్లోలం.. ఉప్పొంగుతున్న నదులు..

కాఠ్‌మాండూ: నేపాల్‌ను మరోసారి భారీ వర్షాలు, వరదలు, కొండచరియలు వణికిస్తున్నాయి. సెప్టెంబర్‌ 24 నుంచి 27 వరకు కురిసిన కుండపోత వర్షాలతో దేశంలోని పలు ప్రాంతాల్లో నదులు ఉప్పొంగి గ్రామాలు, నివాస ప్రాంతాలు నీట మునిగాయి. వరదలతో పాటు కొండచరియలు విరిగిపడటంతో ప్రాణ, ఆస్తి నష్టం భారీగా నమోదవుతోంది. 

తాజా అధికారిక లెక్కల ప్రకారం 21 మంది ప్రాణాలు కోల్పోగా, మరో ఐదుగురు గల్లంతయ్యారు. మరో ఐదుగురు గాయపడ్డారు. కొండచరియల కారణంగానే అత్యధిక మరణాలు సంభవించినట్లు జాతీయ విపత్తు ప్రమాద తగ్గింపు, నిర్వహణ సంస్థ వెల్లడించింది. సుమారు 260 ఇళ్లు పూర్తిగా ధ్వంసం కాగా, మరో 80 ఇళ్లు పాక్షికంగా దెబ్బతిన్నాయి. 

భారీగా వర్షపాతం

బంగాళాఖాతంలో ఏర్పడిన అల్పపీడన వ్యవస్థ ప్రభావంతో నేపాల్‌లో విస్తారంగా భారీ నుంచి అతి భారీ వర్షాలు కురిశాయి. నాలుగు రోజుల్లో దేశవ్యాప్తంగా 186 వర్షపాత కొలమాన కేంద్రాల్లో 100 మిల్లీమీటర్లకు పైగా వర్షపాతం నమోదైంది. నావల్‌పరాసి తూర్పు ప్రాంతంలోని దేధ్‌గావ్‌లో అత్యధికంగా 544.2 మిల్లీమీటర్లు, కాస్కీలోని పంచాసేలో 500.2 మిల్లీమీటర్లు, తనహున్‌లోని అత్రౌలిటార్‌లో 472 మిల్లీమీటర్ల వర్షపాతం నమోదైంది. 

నదులు ఉప్పొంగి.. రహదారులు మూసివేత

నారాయణి, సప్తకోశి సహా పలు నదుల్లో నీటిమట్టాలు ప్రమాదకర స్థాయికి చేరాయి. సప్తరీ జిల్లాలో వందలాది ఇళ్లు నీట మునిగాయి. నావల్‌పరాసి ప్రాంతంలో నారాయణి నది వరదతో అనేక కుటుంబాలను సురక్షిత ప్రాంతాలకు తరలించారు. 

భారీ వర్షాలు, కొండచరియల కారణంగా పృథ్వీ రహదారి, బీపీ రహదారి, కాంతి రహదారి సహా కీలక మార్గాల్లో రాకపోకలకు అంతరాయం ఏర్పడింది. కొన్ని ప్రాంతాల్లో రహదారులు కొట్టుకుపోవడంతో వాహనాలు నిలిచిపోయాయి. 

వేలాది మందికి సురక్షిత ప్రాంతాలకు తరలింపు

వరదలు, కొండచరియల ముప్పు ఉన్న ప్రాంతాల నుంచి సుమారు 2,000 నుంచి 3,000 మంది ప్రజలను అధికారులు సురక్షిత ప్రాంతాలకు తరలించారు. జాజర్‌కోట్‌, మ్యాగ్డి, బాగ్లుంగ్‌ తదితర పర్వత ప్రాంతాల్లో చిక్కుకున్న వారిని సైనిక హెలికాప్టర్ల ద్వారా రక్షించారు. 

నారాయణి నది నీటిమట్టం హెచ్చరిక స్థాయిని దాటడంతో నదీ పరివాహక ప్రాంతాల ప్రజలను అధికారులు అప్రమత్తం చేశారు. అత్యవసర పరిస్థితుల్లో ప్రజలు అనవసర ప్రయాణాలు చేయవద్దని, నదులు, కొండ ప్రాంతాలకు దూరంగా ఉండాలని నేపాల్‌ ప్రభుత్వం సూచించింది. 

ఇప్పటికే ఆగస్టు 26న భారీ వరద విపత్తును ఎదుర్కొన్న నేపాల్‌లో తాజాగా మరోసారి ప్రకృతి ప్రకోపం చోటుచేసుకోవడంతో ప్రజలు తీవ్ర భయాందోళనలకు గురవుతున్నారు.