కృత్రిమ మేధతో ఉద్యోగాలకు ముప్పు.. సింగపూర్ అధ్యక్షుడు హెచ్చరిక

సూర్య అంతర్జాతీయ డెస్క్: ప్రపంచవ్యాప్తంగా వేగంగా విస్తరిస్తున్న కృత్రిమ మేధ (ఏఐ) సాంకేతికత ఉపాధి రంగంపై తీవ్ర ప్రభావం చూపుతోందని సింగపూర్ అధ్యక్షుడు థర్మన్ షణ్ముగరత్నం ఆందోళన వ్యక్తం చేశారు. బ్యాంకాక్‌లో జరుగుతున్న ఐఎంఎఫ్ మరియు ప్రపంచ బ్యాంకు వార్షిక సమావేశాలలో ఆయన మాట్లాడుతూ, ఏఐ పుణ్యమా అని కాలేజీలు పూర్తి చేసుకుని బయటకు వస్తున్న తాజా గ్రాడ్యుయేట్లకు (ఫ్రెషర్స్) తొలి ఉద్యోగం లభించడం కష్టంగా మారుతోందని స్పష్టం చేశారు. ముఖ్యంగా ఏఐ ప్రభావం అధికంగా ఉన్న సెక్టార్లలో ఎంట్రీ-లెవెల్ ఉద్యోగాల డిమాండ్ గణనీయంగా తగ్గుతున్నట్లు స్పష్టమైన సంకేతాలు కనిపిస్తున్నాయని తెలిపారు.

సాంప్రదాయ ఉద్యోగ మార్కెట్లలో ప్రవేశించాలనుకునే యువతకు ఈ పరిణామం పెద్ద సవాల్‌గా మారుతోందని థర్మన్ పేర్కొన్నారు. అభివృద్ధి చెందిన, అభివృద్ధి చెందుతున్న దేశాల మధ్య సాంకేతిక అంతరాల కారణంగా భవిష్యత్తులో కొత్త అసమానతలు ఏర్పడే ప్రమాదం ఉందని ఆయన హెచ్చరించారు. ఈ సంక్షోభాన్ని అధిగమించడానికి ప్రపంచ దేశాల ప్రభుత్వాలు సమిష్టిగా తగిన విధానాలను రూపొందించాలని, యువతకు అవసరమైన అదనపు నైపుణ్య శిక్షణను అందించేందుకు ప్రత్యేక వ్యూహాలు అమలు చేయాలని ఆయన సూచించారు.