వాణిజ్య నౌకలు, నావికులపై దాడులను తీవ్రంగా ఖండించిన భారత్..

లైబీరియా: అంతర్జాతీయ సముద్ర భద్రతకు ముప్పుగా మారాయని ఆందోళన!
సూర్య అంతర్జాతీయ డెస్క్: గల్ఫ్ ప్రాంతం మరియు నల్ల సముద్రంలో (బ్లాక్ సీ) వాణిజ్య నౌకలు, సముద్ర నావికులపై (సీఫేరర్స్) వరుసగా జరుగుతున్న దాడులను భారతదేశం, పశ్చిమ ఆఫ్రికా దేశమైన లైబీరియా తీవ్రంగా ఖండించాయి. అంతర్జాతీయ సముద్ర వాణిజ్యంపై ప్రభావం చూపేలా, అమాయక నావికుల ప్రాణాలను బలితీసుకునేలా సాగుతున్న ఈ అనాగరిక దాడులు ఏమాత్రం సమర్థనీయం కాదని ఇరు దేశాలు స్పష్టం చేశాయి. ఐక్యరాజ్యసమితి వేదికగా ఏర్పడిన ‘గ్రూప్ ఆఫ్ ఫ్రెండ్స్ ఆన్ సేఫ్టీ అండ్ సెక్యూరిటీ ఆఫ్ షిప్పింగ్ అండ్ సీఫేరర్స్’ (GoF on S4) సహ-అధ్యక్ష దేశాలుగా భారత్, లైబీరియా సంయుక్త ప్రకటన విడుదల చేశాయి.

గత కొద్దిరోజులుగా నల్ల సముద్రంలో టోగో జెండాతో వెళ్తున్న ‘ఆల్ఫా వతన్’, పలావు జెండాతో ఉన్న ‘ఏబుల్’ మరియు లైబీరియా జెండాతో ప్రయాణిస్తున్న ‘ఆఫ్రామాక్స్ రియో’ వాణిజ్య నౌకలపై క్షిపణి మరియు డ్రోన్ దాడులు జరిగాయి. వీటిలో ప్రయాణిస్తున్న పలువురు భారతీయ నావికులు ప్రమాదంలో చిక్కుకోగా, ఒకరు తీవ్రంగా గాయపడ్డారు. మరోవైపు ఒమన్ తీర సమీపంలోని హోర్ముజ్ జలసంధి గుండా వెళ్తున్న పనామా జెండా నౌకపై జరిగిన దాడిలో 11 మంది భారతీయ నావికులు గాయపడిన ఘటన తీవ్ర ఆందోళన రేకెత్తించింది. అంతర్జాతీయ జలాల్లో వాణిజ్య రవాణాకు ఆటంకం కలిగించే ఇలాంటి సైనిక దాడులను తక్షణమే నిలిపివేయాలని ఇరు దేశాలు డిమాండ్ చేశాయి.

ప్రాంతీయ శాంతి, స్థిరత్వాల పరిరక్షణతో పాటు అంతర్జాతీయ సముద్ర మార్గాల్లో సజావుగా వాణిజ్యం సాగేందుకు అన్ని దేశాలు సహకరించాలని భారత్, లైబీరియా విజ్ఞప్తి చేశాయి. ఈ దాడుల్లో ప్రాణాలు కోల్పోయిన నావికుల కుటుంబాలకు ప్రగాఢ సానుభూతి తెలిపిన ఇరు దేశాలు, గాయపడిన వారు త్వరగా కోలుకోవాలని ఆకాంక్షించాయి. భవిష్యత్తులో ఇలాంటి దాడులు పునరావృతం కాకుండా అడ్డుకోవడానికి, ప్రపంచవ్యాప్తంగా నావికుల హక్కులు, వారి ప్రాణ రక్షణ కోసం అంతర్జాతీయ స్థాయిలో సమన్వయాన్ని మరింత పటిష్టం చేయడానికి సిద్ధంగా ఉన్నామని సంయుక్త ప్రకటనలో పునరుద్ఘాటించాయి.