'టార్టాయిస్' ఒక యూనిక్ థ్రిల్లర్ మూవీ, థియేటర్స్‌లో కంప్లీట్ ఎంగేజ్‌మెంట్: హీరో రాజ్ తరుణ్!
టాలీవుడ్‌లో వైవిధ్యమైన కథలతో దూసుకుపోతున్న యువ హీరో రాజ్ తరుణ్ నటిస్తున్న తాజా చిత్రం ‘టార్టాయిస్’ (Tortoise). ఈ చిత్రంలో అమృత చౌదరి హీరోయిన్‌గా నటిస్తుండగా, ప్రముఖ నటులు అవసరాల శ్రీనివాస్, ధన్య బాలకృష్ణ ఇతర కీలక పాత్రల్లో కనిపించనున్నారు. ఎస్ కే గోల్డెన్ ఆర్ట్స్, ప్రశ్విత ఎంటర్టైన్మెంట్, ఎన్ వీ ఎల్ క్రియేషన్స్ బ్యానర్లపై విజయ్ చౌదరి, శశిధర్ నల్ల, రామిశెట్టి రాంబాబు ఈ చిత్రాన్ని సంయుక్తంగా నిర్మిస్తున్నారు. సస్పెన్స్, డ్రామా మేళవింపుతో కూడిన ఇంటెన్స్ యాక్షన్ థ్రిల్లర్‌గా దర్శకుడు రిత్విక్ కుమార్ ఈ సినిమాను తెరకెక్కిస్తున్నారు.
ఇదిలా ఉంటే, తాజాగా ఈ సినిమాలోని 'నీ పరిచయం...' అంటూ సాగే మెలోడియస్ పాటను హైదరాబాద్‌లో అత్యంత వైభవంగా విడుదల చేశారు. ఈ కార్యక్రమానికి చిత్ర యూనిట్‌తో పాటు ప్రముఖ గీత రచయిత చంద్రబోస్ తదితరులు హాజరై సందడి చేశారు.
ఈ సందర్భంగా హీరో రాజ్ తరుణ్ మాట్లాడుతూ... "'టార్టాయిస్' అనేది ఒక యూనిక్ థ్రిల్లర్ మూవీ. థియేటర్స్‌లో ప్రేక్షకులను ఇది పూర్తిగా ఎంగేజ్ చేస్తుంది. ప్రతీ సీన్ ఉత్కంఠభరితంగా సాగుతుంది" అని తెలిపారు.
ఈ పాట విశేషాల గురించి ప్రముఖ లిరిసిస్ట్ చంద్రబోస్ మాట్లాడుతూ... ప్రేమ, ఆర్తి, అక్కెరతో కూడుకున్న ఈ పాటను అనూప్ రూబెన్స్ అత్యద్భుతంగా కంపోజ్ చేయగా, చిన్మయి తన మధురమైన గొంతుతో ప్రాణం పోశారని ప్రశంసించారు. ఈ చిత్రం ప్రేక్షకులను కచ్చితంగా ఆకట్టుకుంటుందనే నమ్మకం తనకుందని ఆయన అన్నారు.
నిర్మాతలు విజయ్ చౌదరి, శశిధర్ నల్ల మాట్లాడుతూ... 'నీ పరిచయం' పాట సినిమాకి ఒక పిల్లర్ లాంటిదని, ఎమోషనల్ టచ్ ఉన్న ఈ ట్రాక్ అందరినీ కట్టిపడేస్తుందని తెలిపారు. దర్శకుడు రిత్విక్ కుమార్ ఎక్కడా రాజీ పడకుండా ప్లాన్ ప్రకారం అనుకున్న సమయానికి షూటింగ్ పూర్తి చేశారని, రాజ్ తరుణ్ మరియు అమృత నటన ఈ సినిమాకు ప్రధాన ఆకర్షణగా నిలుస్తాయని పేర్కొన్నారు. త్వరలోనే ఈ చిత్రానికి సంబంధించిన రిలీజ్ డేట్‌ను అధికారికంగా ప్రకటించనున్నారు.
