విశాఖ ఆస్తులను కాపాడుకుందాం!
- కూటమి పాలనలో నగర అభివృద్ధి నిర్వీర్యం
- ఆరు గ్యారెంటీల అమలుపై సమాధానం చెప్పాలి
- గీతం భూములు, స్టీల్‌ప్లాంట్‌, సింహాచలం భూముల పరిరక్షణకు తీర్మానాలు
- విశాఖను దేశంలో టాప్‌-5 నగరంగా తీర్చిదిద్దడమే లక్ష్యం
- వైకాపా మేయర్ అభ్యర్థి వరుదు కల్యాణి
విశాఖపట్నం, (మేజర్ న్యూస్): కూటమి ప్రభుత్వం నుంచి విశాఖ ప్రజల ఆస్తులను కాపాడుకోవాలని వైఎస్సార్‌సీపీ మేయర్ అభ్యర్థి, ఎమ్మెల్సీ వరుదు కల్యాణి పిలుపునిచ్చారు. సోమవారం నగరంలోని ఓ హోటల్‌లో వైకాపా జిల్లా అధ్యక్షుడు కె.కె.రాజుతో కలిసి నిర్వహించిన మీడియా సమావేశంలో ఆమె మాట్లాడారు. కూటమి పాలనలో విశాఖ అభివృద్ధి కుంటుపడిందని, కొండల విధ్వంసం, భూకబ్జాలు, తాగునీటి సమస్యలతో ప్రజలు ఇబ్బందులు పడుతున్నారని ఆరోపించారు. మహిళలకు ఆడబిడ్డ నిధి కింద రూ.54 వేల బకాయిలు, నిరుద్యోగులకు నెలకు రూ.3 వేల భృతి ఏమయ్యాయని ప్రశ్నించారు. ఎన్నికల హామీల అమలుపై సమాధానం చెప్పిన తర్వాతే కూటమి నేతలు ఓట్లు అడగాలని డిమాండ్ చేశారు. వైకాపా విజయం సాధిస్తే అవినీతి రహిత, పారదర్శక పాలన అందిస్తామని కల్యాణి హామీ ఇచ్చారు. గీతం భూములు, విశాఖ స్టీల్‌ప్లాంట్‌, సింహాచలం భూముల పరిరక్షణపై జీవీఎంసీలో తీర్మానాలు చేస్తామన్నారు. తాగునీటి సమస్యకు శాశ్వత పరిష్కారం, కాలుష్య నియంత్రణ, పార్కులు, హెల్త్‌ అరేనాల అభివృద్ధికి ప్రాధాన్యం ఇస్తామని తెలిపారు. మహిళల భద్రత, మాదకద్రవ్యాల నియంత్రణకు ప్రత్యేక చర్యలు చేపడతామన్నారు. విశాఖను దేశంలోని అగ్ర ఐదు నగరాల్లో ఒకటిగా తీర్చిదిద్దడమే తమ లక్ష్యమని పేర్కొన్నారు. ప్రజా ఆస్తుల పరిరక్షణ కోసం 'సేవ్ వైజాగ్' నినాదంతో ముందుకు వెళ్తున్నామని తెలిపారు. సమావేశంలో మాజీ ఎమ్మెల్యే తైనాల విజయకుమార్, మాజీ మేయర్ గోలగాని హరి వెంకటకుమారి, మొల్లి అప్పారావు, తిప్పల గురుమూర్తిరెడ్డి, పేడాడ రమణికుమారి తదితరులు పాల్గొన్నారు.
