విద్యార్థుల భవిష్యత్కు అండగా వై.వి. నాయుడు చారిటబుల్ ట్రస్ట్
ప్రతిభకు ప్రోత్సాహం.. 48 మంది విద్యార్థులకు స్కాలర్షిప్లు
ప్రొద్దుటూరు అర్బన్ మేజర్ న్యూస్:
విద్యార్థుల్లో ప్రతిభను ప్రోత్సహించడంతో పాటు ఆర్థికంగా వెనుకబడిన వారికి విద్యాభ్యాసంలో అండగా నిలిచే లక్ష్యంతో వై.వి. నాయుడు చారిటబుల్ ట్రస్ట్, కడప ఆధ్వర్యంలో ప్రొద్దుటూరు ప్రభుత్వ పాలిటెక్నిక్ కళాశాలలో మెరిట్ స్కాలర్షిప్లను పంపిణీ చేశారు. సోమవారం నిర్వహించిన కార్యక్రమంలో ద్వితీయ సంవత్సరం, చివరి సంవత్సరం చదువుతున్న మొత్తం 48 మంది ప్రతిభావంతులైన విద్యార్థులకు సుమారు రూ.2 లక్షల విలువైన స్కాలర్షిప్లను అందజేశారు. దివంగత వై.వి. నాయుడు కుమారులు వై. వినయ్ కుమార్, డాక్టర్ వై. రామ సంజయ్, కోడలు సి. సునీత, మనుమడు వై. సాయి వేణుగోపాల్ విద్యార్థులకు స్కాలర్షిప్లను అందజేశారు. ఈ సందర్భంగా వారు మాట్లాడుతూ, తమ తండ్రి దివంగత వై.వి. నాయుడు ప్రొద్దుటూరు ప్రభుత్వ పాలిటెక్నిక్ కళాశాలలో ఎలక్ట్రికల్ ఇంజనీరింగ్ విభాగాధిపతిగా సేవలందించారని గుర్తుచేశారు. ఈ కళాశాలతో తమ కుటుంబానికి ఎంతోకాలంగా అనుబంధం ఉందని తెలిపారు. తమ కుటుంబానికి చెందిన వై. వినయ్ కుమార్ కూడా ఇదే కళాశాలలో పూర్వ విద్యార్థి అని పేర్కొన్నారు. విద్యార్థుల ప్రతిభను గుర్తించి ప్రోత్సహించడం, ఆర్థిక ఇబ్బందులు ఎదుర్కొంటున్న విద్యార్థులకు విద్యాభ్యాసంలో తోడ్పాటు అందించాలనే ఉద్దేశంతో వై.వి. నాయుడు చారిటబుల్ ట్రస్ట్ ద్వారా స్కాలర్షిప్లను అందిస్తున్నట్లు తెలిపారు. విద్యార్థులు ఈ అవకాశాన్ని సద్వినియోగం చేసుకుని ఉన్నత లక్ష్యాలను చేరుకోవాలని ఆకాంక్షించారు. భవిష్యత్తులోనూ విద్యార్థుల విద్యాభివృద్ధికి తమ వంతు సహకారం కొనసాగిస్తామని వెల్లడించారు. కార్యక్రమానికి ముఖ్య అతిథిగా హాజరైన ప్రొద్దుటూరు ప్రభుత్వ పాలిటెక్నిక్ కళాశాల ప్రిన్సిపాల్ పాలెం గురుమూర్తి రెడ్డి మాట్లాడుతూ, వై.వి. నాయుడు చారిటబుల్ ట్రస్ట్ ద్వారా సుమారు రూ.2 లక్షల విలువైన మెరిట్ స్కాలర్షిప్లను 48 మంది ప్రతిభావంతులైన విద్యార్థులకు అందించడం అభినందనీయమన్నారు. విద్యార్థుల ప్రతిభను గుర్తించి ప్రోత్సహించడం వల్ల వారు మరింత ఉత్సాహంతో విద్యలో రాణించేందుకు అవకాశం ఉంటుందని తెలిపారు. ఇటువంటి ప్రోత్సాహకాలు విద్యార్థుల ఉన్నత విద్యకు, భవిష్యత్లో మెరుగైన ఉపాధి అవకాశాలను అందిపుచ్చుకోవడానికి ఎంతగానో ఉపయోగపడతాయని ప్రిన్సిపాల్ పేర్కొన్నారు. విద్యార్థుల అభివృద్ధికి ట్రస్ట్ అందిస్తున్న సహకారానికి కళాశాల తరఫున ప్రత్యేక కృతజ్ఞతలు తెలిపారు. ఈ కార్యక్రమంలో కళాశాల విభాగాధిపతులు, అధ్యాపకులు, విద్యార్థులు, తల్లిదండ్రులు పాల్గొన్నారు. స్కాలర్షిప్లు అందుకున్న విద్యార్థులు, అధ్యాపకులు వై.వి. నాయుడు చారిటబుల్ ట్రస్ట్ సభ్యులకు కృతజ్ఞతలు తెలిపారు.
