స్థానిక సంస్థల ఎన్నికలకు టీడీపీ శ్రేణులు సిద్ధం కావాలి

ప్రొద్దుటూరు అర్బన్ మేజర్ న్యూస్ :

రాబోయే స్థానిక సంస్థల ఎన్నికలను దృష్టిలో ఉంచుకుని తెలుగుదేశం పార్టీ నాయకులు, కార్యకర్తలు ఇప్పటి నుంచే ఎన్నికలకు పూర్తి స్థాయిలో సిద్ధం కావాలని ఎమ్మెల్యే నంద్యాల వరదరాజులరెడ్డి పిలుపునిచ్చారు. బుధవారం ప్రొద్దుటూరు టీడీపీ కార్యాలయంలో పార్టీ నాయకులు, క్యాడర్‌తో సమావేశం నిర్వహించి రాబోయే ఎన్నికల సన్నద్ధతపై దిశానిర్దేశం చేశారు. ఈ సందర్భంగా ఎమ్మెల్యే మాట్లాడుతూ ప్రతి నాయకుడు, కార్యకర్త తమకు సంబంధించిన ప్రాంతంలోని ఓటర్ల జాబితాను క్షుణ్ణంగా పరిశీలించుకోవాలని సూచించారు. ఓటర్ల జాబితాలో పేర్లు, చిరునామాలు తదితర వివరాలను పరిశీలించి ఏవైనా లోపాలు ఉంటే వాటిని గుర్తించి సరిచేసుకునేలా చర్యలు తీసుకోవాలన్నారు. ఎన్నికల సమయంలో ఎలాంటి ఇబ్బందులు తలెత్తకుండా ముందస్తుగానే ఓటర్ల జాబితాపై అవగాహన కలిగి ఉండాలని సూచించారు. అదేవిధంగా పార్టీ నాయకులు, కార్యకర్తలు ప్రజలతో నిరంతరం మమేకమై వారి సమస్యలను తెలుసుకోవాలని ఎమ్మెల్యే కోరారు. ప్రజలతో సత్సంబంధాలను కొనసాగిస్తూ వారి సమస్యల పరిష్కారానికి అందుబాటులో ఉండాలని అన్నారు. కూటమి ప్రభుత్వం అమలు చేస్తున్న వివిధ సంక్షేమ పథకాలు, ప్రభుత్వం చేపడుతున్న అభివృద్ధి కార్యక్రమాల గురించి ప్రజలకు వివరించాలని సూచించారు. కూటమి ప్రభుత్వం ద్వారా ప్రజలకు అందుతున్న సంక్షేమ పథకాలు, ప్రొద్దుటూరు నియోజకవర్గంలో చేపడుతున్న అభివృద్ధి కార్యక్రమాల వివరాలను ప్రతి ఇంటికీ వెళ్లి ప్రజలకు చేరవేయాలని ఎమ్మెల్యే వరదరాజులరెడ్డి పార్టీ శ్రేణులకు సూచించారు. ప్రభుత్వ పథకాల ద్వారా లబ్ధి పొందుతున్న ప్రజల వివరాలను తెలుసుకుని, అర్హులైన ప్రతి ఒక్కరికీ ప్రభుత్వ సంక్షేమ ఫలాలు అందేలా సహకరించాలని అన్నారు. రాబోయే స్థానిక సంస్థల ఎన్నికల్లో పార్టీ శ్రేణులంతా సమన్వయంతో పనిచేయాలని, గ్రామ, వార్డు స్థాయి నుంచి పార్టీని మరింత బలోపేతం చేసేందుకు కృషి చేయాలని ఎమ్మెల్యే సూచించారు. ప్రజలకు అందుబాటులో ఉంటూ ప్రభుత్వ కార్యక్రమాలను ప్రజల్లోకి విస్తృతంగా తీసుకెళ్లాలని ఆయన పిలుపునిచ్చారు. సమావేశంలో పలువురు టీడీపీ నాయకులు, కార్యకర్తలు పాల్గొన్నారు.