ఉద్యోగులకు శుభవార్త.. రెండు డీఏలకు ప్రభుత్వం అంగీకారం

సీఎస్‌తో ఉద్యోగ జేఏసీ నేతల చర్చలు సఫలం.. వచ్చే కేబినెట్‌లో ఆమోదం తెలిపే అవకాశం

హైదరాబాద్‌: తెలంగాణ ప్రభుత్వ ఉద్యోగులకు సంబంధించిన కరువు భత్యం (డీఏ) అంశంపై ఉద్యోగ సంఘాల జేఏసీ నేతలతో ప్రభుత్వ ప్రధాన కార్యదర్శి నిర్వహించిన చర్చలు సఫలమయ్యాయి. ఉద్యోగులకు పెండింగ్‌లో ఉన్న రెండు డీఏలను మంజూరు చేసేందుకు ప్రభుత్వం అంగీకరించినట్లు ఉద్యోగ సంఘాల నేతలు తెలిపారు.

సీఎస్‌తో జరిగిన సమావేశంలో ఉద్యోగుల సమస్యలు, పెండింగ్‌లో ఉన్న డీఏలపై ప్రధానంగా చర్చించారు. ఉద్యోగ సంఘాల ప్రతినిధులు రెండు డీఏలను వెంటనే ప్రకటించాలని కోరగా.. ప్రభుత్వం సానుకూలంగా స్పందించినట్లు సమాచారం.

వచ్చే కేబినెట్‌లో ఆమోదం?

రెండు డీఏలకు సంబంధించిన ప్రతిపాదనలను వచ్చే రాష్ట్ర మంత్రివర్గ సమావేశంలో ఆమోదించే అవకాశం ఉందని ఉద్యోగ సంఘాల నేతలు తెలిపారు. కేబినెట్‌ ఆమోదం అనంతరం ప్రభుత్వం అధికారిక ఉత్తర్వులు జారీ చేసే అవకాశం ఉంది.

రెండు డీఏలకు ప్రభుత్వం అంగీకరించడంపై ఉద్యోగ సంఘాల నేతలు హర్షం వ్యక్తం చేశారు. ఉద్యోగుల పెండింగ్‌ సమస్యలను దశలవారీగా పరిష్కరించాలని ప్రభుత్వాన్ని కోరినట్లు తెలిపారు.