ప్రజల అధికారులు అప్రమత్తంగా ఉండాలి
నేటి దినపత్రిక సూర్య బ్యూరో రాజమహేంద్రవరం బంగాళాఖాతంలో ఏర్పడిన ఆర్నాబ్ తుఫాన్ ప్రభావాన్ని దృష్టిలో ఉంచుకుని ఆలమూరు మండలంలోని ప్రజలు, అధికారులు అప్రమత్తంగా ఉండాలని ఎంపీడీవో ఏ. రాజు సూచించారు. జిల్లా కలెక్టర్ ఆదేశాల మేరకు తుఫాన్ కారణంగా ప్రజలకు ఎలాంటి ఇబ్బందులు కలగకుండా ముందస్తు జాగ్రత్త చర్యలు చేపట్టాలని అధికారులకు పిలుపునిచ్చారు.
మండలంలోని అన్ని గ్రామాల్లో తుఫాన్ ప్రభావాన్ని ఎదుర్కొనేందుకు అవసరమైన ఏర్పాట్లు చేయాలని ఆయన అధికారులను ఆదేశించారు. ముఖ్యంగా లోతట్టు ప్రాంతాల్లో నివసించే ప్రజలను గుర్తించి, వారిని సురక్షిత ప్రాంతాలకు తరలించేందుకు చర్యలు తీసుకోవాలని సూచించారు.
అలాగే, ప్రతి గ్రామంలో తాటాకు ఇళ్లలో నివసిస్తున్న కుటుంబాలను ముందుగానే గుర్తించి, ఆయా ఇళ్లను ఖాళీ చేయించి సమీపంలోని పాఠశాల భవనాలు, ఇతర ప్రభుత్వ భవనాలకు తరలించే ఏర్పాట్లు చేయాలని తెలిపారు. ప్రజల భద్రతకు ప్రాధాన్యమిస్తూ సంబంధిత అధికారులు సమన్వయంతో పనిచేయాలని పేర్కొన్నారు.
తుఫాన్ ప్రభావం తగ్గే వరకు ప్రజలు అప్రమత్తంగా ఉండాలని, అధికారులు క్షేత్రస్థాయిలో పరిస్థితులను పర్యవేక్షిస్తూ అవసరమైన సహాయక చర్యలకు సిద్ధంగా ఉండాలని ఎంపీడీవో ఏ. రాజు పిలుపునిచ్చారు.
