పొలమూరులో వైఎస్సార్‌సీపీ ఎన్నికల ప్రచార జోరు- జడ్పీటీసీ, ఎంపీటీసీ అభ్యర్థులను అఖండ మెజారిటీతో గెలిపించండి – సత్తి రామారెడ్డి.
అనపర్తి, మేజర్ న్యూస్:స్థానిక సంస్థల ఎన్నికల నేపథ్యంలో అనపర్తి మండలం పొలమూరు గ్రామంలో వైఎస్సార్ కాంగ్రెస్ పార్టీ ఎన్నికల ప్రచారం ముమ్మరంగా సాగుతోంది. జడ్పీటీసీ, ఎంపీటీసీ స్థానాల్లో పార్టీ అభ్యర్థుల విజయమే లక్ష్యంగా నాయకులు, కార్యకర్తలు సమష్టిగా ప్రచార బాట పట్టారు. గ్రామంలోని పలు వీధుల్లో ఇంటింటికీ వెళ్లి ఓటర్లను కలుసుకుంటూ అభ్యర్థులకు మద్దతు ఇవ్వాలని విజ్ఞప్తి చేశారు. పొలమూరు గ్రామానికి చెందిన వైఎస్సార్‌సీపీ నాయకులు సత్తి రామారెడ్డి, సత్తి సూరారెడ్డి, సత్తి వెంకటరెడ్డి ఆధ్వర్యంలో ఈ ప్రచార కార్యక్రమం నిర్వహించారు. అనపర్తి మండల జడ్పీటీసీ అభ్యర్థి కొండేటి భీమేష్‌తో పాటు పొలమూరు ఎంపీటీసీ-1 అభ్యర్థిని గుడాల ధనలక్ష్మి, ఎంపీటీసీ-2 అభ్యర్థి గుడాల మాచరావులకు మద్దతుగా నాయకులు, కార్యకర్తలు గ్రామంలో విస్తృతంగా పర్యటించారు. అభ్యర్థులను ప్రజలకు పరిచయం చేస్తూ పార్టీ విధానాలు, గ్రామాల అభివృద్ధి, ప్రజా సమస్యల పరిష్కారానికి సంబంధించిన అంశాలను వివరిస్తూ ఓట్లు అభ్యర్థించారు. ఈ సందర్భంగా తూర్పుగోదావరి జిల్లా మాజీ ప్రతిపక్ష నాయకుడు, రైతు బాంధవుడుగా పేరున్న నాయకులు, పొలమూరు వైఎస్సార్‌సీపీ నేత సత్తి రామారెడ్డి మాట్లాడుతూ ప్రస్తుత ప్రభుత్వ పాలనపై ప్రజల్లో వ్యతిరేకత ఉందని పేర్కొన్నారు. గ్రామంలో నిర్వహిస్తున్న ఇంటింటి ప్రచారానికి ప్రజల నుంచి స్పందన లభిస్తోందన్నారు. పార్టీ నాయకులు, కార్యకర్తలు సమన్వయంతో పనిచేస్తూ ఎన్నికల ప్రచారాన్ని ముందుకు తీసుకెళ్తున్నారని తెలిపారు.రానున్న స్థానిక సంస్థల ఎన్నికలు గ్రామాల అభివృద్ధి, ప్రజా సమస్యల పరిష్కారానికి సంబంధించి కీలకమని పేర్కొంటూ, ప్రజలు తమ అభ్యర్థులకు మద్దతు తెలపాలని కోరారు. ఈ ఎన్నికలు భవిష్యత్తు రాజకీయ పరిణామాలకు కూడా ప్రాధాన్యత కలిగినవని, 2029 సార్వత్రిక ఎన్నికలకు రాజకీయంగా ఒక దిశానిర్దేశం చేసే అవకాశం ఉందని ఆయన అభిప్రాయపడ్డారు.ఈ నేపథ్యంలో ఓటర్లు తమ అమూల్యమైన ఓటును ఫ్యాన్ గుర్తుపై వేసి జడ్పీటీసీ అభ్యర్థి కొండేటి భీమేష్‌తో పాటు ఎంపీటీసీ అభ్యర్థులు గుడాల ధనలక్ష్మి, గుడాల మాచరావులను అఖండ మెజారిటీతో గెలిపించాలని సత్తి రామారెడ్డి విజ్ఞప్తి చేశారు.ఈ ప్రచార కార్యక్రమంలో వైఎస్సార్‌సీపీ గ్రామ నాయకులు, పార్టీ శ్రేణులు, కార్యకర్తలు అధిక సంఖ్యలో పాల్గొన్నారు. ఇంటింటి ప్రచారం, ఓటర్లతో ప్రత్యక్ష సమావేశాలతో పొలమూరు గ్రామంలో ఎన్నికల సందడి నెలకొంది.
