ముంపు దారికి అడ్డొస్తే.. తొలగించాల్సిందే!

కాలువలు, డ్రైన్లపై ఆక్రమణలకు చెక్‌

అక్టోబర్‌ అంతా క్షేత్రంలోనే జేసీ అపూర్వ భరత్‌

వరి కోతలకు ముందే నీటి ప్రవాహం సాఫీగా ఉండేలా చర్యలు

పిఠాపురం, గొల్లప్రోలు ముంపు ప్రాంతాలపై ప్రత్యేక దృష్టి

అన్నవరం, తాళ్లరేవుల్లో అవసరమైతే పోలీసు బందోబస్తు

ఉమ్మడి గోదావరి జిల్లాల సూర్య బ్యూరో 

(కాకినాడ)
పంట కాలువలు, డ్రైన్లలో నీటి ప్రవాహానికి అడ్డుగా మారిన ఆక్రమణలపై జిల్లా యంత్రాంగం దృష్టి సారించింది. నిబంధనల ప్రకారం వాటిని గుర్తించి, చట్టపరమైన ప్రక్రియ పూర్తిచేసి తొలగించాలని జాయింట్‌ కలెక్టర్‌ అపూర్వ భరత్‌ అధికారులను ఆదేశించారు. అక్టోబరు నెలాఖరుకు వరి పంటలు కోతకు రానున్న నేపథ్యంలో ముంపుతో రైతులకు నష్టం వాటిల్లకుండా ఇప్పటి నుంచే కాలువలు, డ్రైన్లలో నీరు సాఫీగా వెళ్లేలా చర్యలు చేపట్టాలని స్పష్టం చేశారు.

స్థానిక కలెక్టరేట్‌లో బుధవారం ఏలేరు, గోదావరి ఈస్ట్రన్‌ ఇరిగేషన్‌ డివిజన్లు, జిల్లా డ్రైనేజీ విభాగం ఇంజినీర్లు, పంచాయతీ అధికారులతో వాచ్‌డాగ్‌ పర్యవేక్షణ కమిటీ సమావేశం నిర్వహించారు. ఆక్రమణల పరిస్థితి, ముంపునకు కారణమవుతున్న ప్రాంతాలు, చేపట్టాల్సిన చర్యలపై సమీక్షించారు.

రోజు విడిచి రోజు క్షేత్రంలోకి..

అక్టోబరు నెలంతా రోజు విడిచి రోజు మూడు ఇరిగేషన్‌ డివిజన్ల పరిధిలో విస్తృతంగా పర్యటిస్తానని జేసీ తెలిపారు. ముంపు నీటి ప్రవాహానికి అడ్డుగా ఉన్న ఆక్రమణలను క్షేత్రస్థాయిలో గుర్తించి తొలగించేందుకు చర్యలు తీసుకుంటామన్నారు. ఇంజినీర్లు కూడా నిరంతరం క్షేత్రస్థాయిలో పర్యటిస్తూ సమస్యాత్మక ప్రాంతాలను ముందుగానే గుర్తించాలని సూచించారు.

పిఠాపురం, గొల్లప్రోలుపై ప్రత్యేక దృష్టి

పిఠాపురం, గొల్లప్రోలు ప్రాంతాల్లో ముంపు సమస్యపై ప్రత్యేకంగా దృష్టి పెట్టాలని అధికారులను ఆదేశించారు. అన్నవరం, తాళ్లరేవుల్లో ఆక్రమణల తొలగింపునకు అవసరమైతే డీఎస్పీ ఆధ్వర్యంలో పోలీసు బలగాలను మోహరించాలని సూచించారు. రెవెన్యూ, పంచాయతీరాజ్‌, మున్సిపల్‌, ఇరిగేషన్‌, పోలీసు శాఖలు సమన్వయంతో వ్యవహరించి, నిబంధనల మేరకు నోటీసులు జారీ చేసిన తర్వాతే తొలగింపు చర్యలు చేపట్టాలని స్పష్టం చేశారు.

తొలగింపుతోనే సరిపోదు..

ఆక్రమణల తొలగింపుతో పాటు కాలువల్లో పేరుకుపోయిన పూడిక, చెత్తను తొలగించాలని జేసీ ఆదేశించారు. ఒకసారి ఆక్రమణలు తొలగించిన ప్రాంతాల్లో మళ్లీ ఆక్రమణలు జరగకుండా వాచ్‌డాగ్‌ కమిటీ నిరంతరం పర్యవేక్షించాలన్నారు. డ్రైనేజీ సమస్యలపై ప్రజల నుంచి వచ్చే ఫిర్యాదులను త్వరితగతిన పరిష్కరించాలని, మండలాలు, మున్సిపాలిటీల వారీగా ఆక్రమణల తొలగింపుపై నివేదికలు సిద్ధం చేయాలని సూచించారు.

సమావేశంలో జిల్లా రెవెన్యూ అధికారి డాక్టర్‌ డి.తిప్పేనాయక్‌, పెద్దాపురం ఆర్డీఓ జి.కృష్ణమూర్తి, స్థానిక ఆర్డీఓ కార్యాలయ పరిపాలనాధికారి చైనులు, ఏలేరు డివిజన్‌ ఇరిగేషన్‌ ఈఈ జి.శేషగిరిరావు, ఈస్ట్రన్‌ డివిజన్‌ ఈఈ వి.వి.రామకృష్ణ, జిల్లా డ్రైనేజీ డివిజన్‌ ఈఈ ఎన్‌.వి.వి.కిషోర్‌, పంచాయతీ అధికారులు, డీఈలు, ఏఈలు పాల్గొన్నారు.