క్రికెట్ బెట్టింగ్ నిర్వహిస్తున్న ఇద్దరు అరెస్ట్. రూ.9 వేల నగదు, సెల్ఫోన్ స్వాధీనం. ప్రొద్దుటూరు వన్టౌన్ పోలీసుల చర్యలు
ప్రొద్దుటూరు, సెప్టెంబర్ 28 మేజర్ న్యూస్:
ప్రొద్దుటూరు వన్టౌన్ పోలీస్ స్టేషన్ పరిధిలో ఆన్లైన్ క్రికెట్ బెట్టింగ్ నిర్వహిస్తున్న ఇద్దరిని సోమవారం పోలీసులు అరెస్ట్ చేశారు. రామేశ్వరం రోడ్డులోని ఆనా బంక్ సమీపంలోని ఈశ్వర్రెడ్డి నగర్ ప్రాంతంలో ఆన్లైన్ క్రికెట్ బెట్టింగ్ నిర్వహిస్తున్నట్లు సమాచారం అందడంతో పోలీసులు తనిఖీలు చేపట్టారు. ఈ క్రమంలో ఈశ్వర్రెడ్డి నగర్కు చెందిన నక్క శ్రీకాంత్, నాగేపల్లి రాజేష్ అనే ఇద్దరు వ్యక్తులు Old 777.com యాప్ ద్వారా ఆన్లైన్ క్రికెట్ బెట్టింగ్, జూదం నిర్వహిస్తున్నట్లు పోలీసులు గుర్తించారు. వెంటనే వారిని అదుపులోకి తీసుకుని అరెస్ట్ చేశారు. ప్రొద్దుటూరు వన్టౌన్ ఎస్ఐ మైనుద్దీన్ ఆధ్వర్యంలో చేపట్టిన ఈ చర్యల్లో నిందితుల వద్ద నుంచి రూ.9,000 నగదు, ఒక సెల్ఫోన్ స్వాధీనం చేసుకున్నట్లు పోలీసులు తెలిపారు. నిందితులపై కేసు నమోదు చేసి తదుపరి దర్యాప్తు చేపట్టారు.
అసాంఘిక కార్యకలాపాలపై ఉక్కుపాదం
ఆన్లైన్ క్రికెట్ బెట్టింగ్, మట్కా, ఇతర జూదాలు మరియు అసాంఘిక కార్యకలాపాలకు పాల్పడే వారిపై కఠినమైన చట్టపరమైన చర్యలు తీసుకుంటామని ప్రొద్దుటూరు వన్టౌన్ సీఐ టి.వి. కొండారెడ్డి హెచ్చరించారు. యువత ఆన్లైన్ బెట్టింగ్, జూదాలకు ఆకర్షితులు కాకుండా దూరంగా ఉండాలని ఆయన సూచించారు. తమ ప్రాంతాల్లో ఎవరైనా క్రికెట్ బెట్టింగ్, మట్కా లేదా ఇతర అసాంఘిక కార్యకలాపాలకు పాల్పడుతున్నట్లు తెలిసిన వెంటనే పోలీసులకు సమాచారం అందించాలని ప్రజలను కోరారు. ప్రజల సహకారంతో ఇటువంటి అక్రమ కార్యకలాపాలను అరికట్టేందుకు ప్రత్యేక చర్యలు కొనసాగుతాయని సీఐ తెలిపారు
