ఎన్నికల్లో అల్లర్లకు పాల్పడితే కఠిన చర్యలు. కంబదూరు ఎస్సై లోకేష్.
**కంబదూరు:** మండల పరిధిలో రేపు జరగనున్న ఎంపీటీసీ, జడ్పీటీసీ ఎన్నికలు ప్రశాంత వాతావరణంలో, ఎలాంటి అవాంఛనీయ సంఘటనలకు తావులేకుండా నిర్వహించేందుకు ప్రతి ఒక్కరూ సహకరించాలని కంబదూరు ఎస్ఐ లోకేష్ ప్రజలకు విజ్ఞప్తి చేశారు. ఎన్నికల సందర్భంగా చట్టవ్యతిరేక కార్యకలాపాలకు పాల్పడినా, అసాంఘిక చర్యలకు దిగినా, ప్రజల మధ్య గొడవలు సృష్టించే ప్రయత్నం చేసినా కఠిన చర్యలు తప్పవని హెచ్చరించారు. ఎన్నికల ప్రక్రియకు ఆటంకం కలిగించే విధంగా వ్యవహరించే వారిని ఏమాత్రం ఉపేక్షించబోమని స్పష్టం చేశారు. ప్రజాస్వామ్య వ్యవస్థలో ఓటు హక్కు అత్యంత విలువైనదని, ప్రతి ఓటరు ఎలాంటి ఒత్తిళ్లకు, ప్రలోభాలకు గురికాకుండా స్వేచ్ఛగా తమ ఓటు హక్కును వినియోగించుకోవాలని సూచించారు. రాజకీయ పార్టీల నాయకులు, అభ్యర్థులు, కార్యకర్తలు ఎన్నికల నిబంధనలను తప్పనిసరిగా పాటించాలని, ప్రత్యర్థులపై దాడులు, దూషణలు, బెదిరింపులకు పాల్పడరాదని పేర్కొన్నారు. ఎన్నికల సమయంలో వ్యక్తిగత విభేదాలు, రాజకీయ వైరుధ్యాలను పక్కనపెట్టి సంయమనంతో వ్యవహరించాలని కోరారు. గ్రామాల్లో ప్రశాంత వాతావరణాన్ని కాపాడటం ప్రతి ఒక్కరి బాధ్యతగా గుర్తించాలని తెలిపారు. ఎవరైనా శాంతిభద్రతలకు భంగం కలిగించే ప్రయత్నం చేసినా, ఎన్నికల నిబంధనలను ఉల్లంఘించినా పోలీసుల దృష్టికి తీసుకురావాలని సూచించారు. ఎన్నికల నిర్వహణలో పోలీసు శాఖకు ప్రజలు సహకరించాలని, ఎలాంటి అవాంఛనీయ సంఘటనలు జరగకుండా అప్రమత్తంగా ఉండాలని ఎస్ఐ లోకేష్ కోరారు. ప్రజలందరి సహకారంతో ఎన్నికలు సజావుగా జరిగేలా చూడాలని ఆయన విజ్ఞప్తి చేశారు.
కళ్యాణదుర్గం టౌన్ రిపోర్టర్ :- బోయ రంగస్వామి.
