ఎన్నికల నేపథ్యంలో అంతర్రాష్ట్ర ఎక్సైజ్ అధికారుల సమన్వయ సమావేశం.
మడకశిర, మేజర్ న్యూస్: మున్సిపల్, గ్రామపంచాయతీ ఎన్నికల నేపథ్యంలో అక్రమ మద్యం రవాణా, కల్తీ కల్లు విక్రయాల నియంత్రణకు కర్ణాటక రాష్ట్ర ఎక్సైజ్ అధికారులతో మడకశిర ప్రొహిబిషన్ మరియు ఎక్సైజ్ స్టేషన్‌లో అంతర్రాష్ట్ర సమన్వయ సమావేశం నిర్వహించారు.ఈ సమావేశంలో సరిహద్దు ప్రాంతాల్లో నేరాల నియంత్రణ, పాత నేరస్తుల అరెస్టు, నిందితులకు సంబంధించిన సమాచార మార్పిడి తదితర అంశాలపై ఇరు రాష్ట్రాల అధికారులు చర్చించారు. ఎన్నికల సమయంలో అక్రమ మద్యం రవాణా, ఇతర చట్టవిరుద్ధ కార్యకలాపాలను అరికట్టేందుకు పరస్పర సమన్వయంతో పనిచేయాలని నిర్ణయించారు.ఇందులో భాగంగా అక్రమ కార్యకలాపాల నియంత్రణకు ప్రతి నెలా ఇరు రాష్ట్రాల ఎక్సైజ్ అధికారులు సంయుక్త దాడులు నిర్వహించాలని తీర్మానించారు. సరిహద్దు ప్రాంతాలపై నిఘా పెంచి, అక్రమ మద్యం రవాణాను అడ్డుకునేందుకు చర్యలు చేపట్టాలని నిర్ణయించారు.ఈ సమావేశంలో మడకశిర ఎక్సైజ్ ఇన్‌స్పెక్టర్ ఎం. మురళీ కిషోర్, ఎక్సైజ్ సబ్‌ ఇన్‌స్పెక్టర్ ఎం. శంకర్, హెడ్ కానిస్టేబుల్ ఏ. అనిల్ కుమార్, కానిస్టేబుళ్లు వీ. చౌడయ్య బాబు, కే. చందన పాల్గొన్నారు.
