ఎన్నికల భద్రతపై ఎస్పీ క్షేత్రస్థాయి పరిశీలన

ఎన్నికల భద్రతపై ఎస్పీ క్షేత్రస్థాయి పరిశీలన
ఎమ్మిగనూరు, సూర్య ప్రతినిధి 
స్థానిక సంస్థల ఎన్నికలు ప్రశాంత వాతావరణంలో నిర్వహించేందుకు పటిష్టమైన భద్రతా చర్యలు చేపట్టాలని కర్నూలు జిల్లా ఎస్పీ విక్రాంత్ పాటిల్ ఐపీఎస్ పోలీసు అధికారులను ఆదేశించారు. శుక్రవారం ఎమ్మిగనూరు నియోజకవర్గ పరిధిలోని పలు కీలక ప్రాంతాలను ఆయన క్షేత్రస్థాయిలో పరిశీలించి, ఎన్నికల భద్రతా ఏర్పాట్లను సమీక్షించారు.
ముందుగా ఎమ్మిగనూరు మున్సిపల్ కార్యాలయంలో ఏర్పాటు చేసిన నామినేషన్ కేంద్రాన్ని తనిఖీ చేశారు. అనంతరం బనవాసి సమీపంలోని జవహర్ నవోదయ విద్యాలయంలో ఏర్పాటు చేసిన స్ట్రాంగ్ రూమ్‌లు, ఓట్ల లెక్కింపు కేంద్రాలను పరిశీలించి, భద్రతా ఏర్పాట్లపై అధికారులకు పలు సూచనలు చేశారు.
ఎమ్మిగనూరు పట్టణంలోని మండల పరిషత్ ఆదర్శ ప్రాథమిక పాఠశాల పోలింగ్ కేంద్రంతో పాటు వెంకటాపురం, ఆది ఆంధ్ర పాఠశాలలను సందర్శించారు. గ్రామీణ ప్రాంతాల్లోని కడిమెట్ల, ఎర్రకోట వంటి సమస్యాత్మక, సున్నిత ప్రాంతాల్లో శాంతిభద్రతల పరిస్థితిని సమీక్షించారు.
అనంతరం ఎమ్మిగనూరు డీఎస్పీ కార్యాలయంలో సబ్ డివిజన్ పోలీసు అధికారులతో సమీక్షా సమావేశం నిర్వహించారు. ఎన్నికల భద్రత, శాంతిభద్రతల పరిరక్షణ, సమస్యాత్మక ప్రాంతాల్లో ముందస్తు చర్యలపై చర్చించారు. ఎలాంటి అవాంఛనీయ సంఘటనలు చోటుచేసుకోకుండా పటిష్టమైన భద్రతా ప్రణాళికను అమలు చేయాలని, పోలీసు అధికారులు, సిబ్బంది నిరంతరం అప్రమత్తంగా ఉండాలని ఆదేశించారు.
ఈ కార్యక్రమంలో ఎమ్మిగనూరు డీఎస్పీ శ్రీనివాసులు, రూరల్ సీఐ చిరంజీవి, టౌన్ సీఐ కంబగిరి రాముడు, టౌన్ ఎస్‌ఐ మధుసూదన్ రెడ్డి, రూరల్ ఎస్‌ఐ శ్రీనివాసులు, నందవరం ఎస్‌ఐ తిమ్మారెడ్డి తదితరులు పాల్గొన్నారు.

రాజ శరత్  కుమార్ 
ఎమ్మిగనూరు సూర్య ప్రతినిధి, కర్నూలు జిల్లా