భూముల కోసం రైతుల పోరుబాట * అర్థనగ్న ప్రదర్శనతో నిరసన.. గ్రామసభను అడ్డుకున్న రైతులు

భోగాపురం, అక్టోబర్ 2, (మేజర్ న్యూస):

తమ భూములను కాపాడుకోవాలనే డిమాండ్‌తో భోగాపురం గ్రామానికి చెందిన రైతులు శుక్రవారం తీవ్ర ఆందోళనకు దిగారు. తమ సమస్యలను పరిష్కరించకుండా భూములకు సంబంధించిన చర్యలు చేపట్టడాన్ని నిరసిస్తూ రైతులు గాంధీ విగ్రహానికి వినతిపత్రం అందజేశారు. అనంతరం పెద్ద ఎత్తున నిరసన వ్యక్తం చేస్తూ అర్థనగ్న ప్రదర్శన చేపట్టారు. తమ తాతల కాలం నుంచి సాగు చేసుకుంటూ వస్తున్న భూములను ఎట్టి పరిస్థితుల్లోనూ కోల్పోయే ప్రసక్తే లేదని రైతులు స్పష్టం చేశారు. భూముల విషయంలో తమ అభ్యంతరాలను పరిగణనలోకి తీసుకోకుండా ముందుకు వెళ్లడం సరికాదని ఆవేదన వ్యక్తం చేశారు. తమ భూములకు న్యాయం జరిగే వరకు ఉద్యమాన్ని కొనసాగిస్తామని హెచ్చరించారు.
ఇదిలా ఉండగా, భూముల అంశంపై జరగాల్సిన గ్రామసభను రైతులు బహిష్కరించారు. అనంతరం కొంతమంది అధికారులు రైతులతో మాట్లాడి గ్రామసభ నిర్వహించేందుకు ప్రయత్నించినప్పటికీ, రైతులు తీవ్ర ఆందోళన వ్యక్తం చేస్తూ గ్రామసభను అడ్డుకున్నారు. దీంతో అక్కడ కొంతసేపు ఉద్రిక్త పరిస్థితి నెలకొంది.
భూములను కాపాడుకునేందుకు ఎంతటి పోరాటానికైనా సిద్ధమేనని రైతులు తేల్చిచెప్పారు. తమ సమస్యకు శాశ్వత పరిష్కారం చూపే వరకు వెనక్కి తగ్గేది లేదని స్పష్టం చేశారు.