స్వచ్ఛ రిక్షాల కొనుగోళ్లపై సమగ్ర విచారణ జరపాలి

తెలంగాణ రక్షణ సేన జిల్లా అధ్యక్షుడు గుంజపడుగు హరిప్రసాద్

 

సూర్య కరీంనగర్ ప్రతినిధి::

 

నగర పాలక సంస్థ ఆధ్వర్యంలో చెత్త సేకరణ కోసం కార్మికులకు పంపిణీ చేసిన స్వచ్ఛ రిక్షాల కొనుగోళ్లలో నాణ్యత లోపాలపై సమగ్ర విచారణ జరపాలని తెలంగాణ రక్షణ సేన జిల్లా అధ్యక్షుడు గుంజపడుగు హరిప్రసాద్ డిమాండ్ చేశారు. కేంద్ర మంత్రి బండి సంజయ్ చేతుల మీదుగా రిక్షాలను పంపిణీ చేసినప్పటికీ, కొన్ని రిక్షాలకు ముందుగానే టైర్లు, ట్యూబులు, తాళాలు, చైన్లు లేకపోవడంతో కార్మికులు తమ సొంత డబ్బులతో మరమ్మతులు చేయించుకున్నారని ఆరోపించారు.

ప్రజాధనంతో కొనుగోలు చేసిన రిక్షాలు కార్మికులకు అందకముందే మరమ్మతులకు గురికావడం కొనుగోళ్ల నాణ్యతపై అనుమానాలకు తావిస్తోందన్నారు. రిపేర్ ఖర్చులను కూడా కార్మికులపైనే వేయడం సరికాదని పేర్కొన్నారు. నాణ్యత లేని రిక్షాల కొనుగోళ్లపై అధికారులు సమగ్ర విచారణ చేపట్టి, బాధ్యులపై చర్యలు తీసుకోవాలని డిమాండ్ చేశారు. కార్మికులపై రిపేర్ భారం మోపకుండా వారికి నాణ్యమైన రిక్షాలు అందించడం నగర పాలక సంస్థ బాధ్యత అని హరిప్రసాద్ స్పష్టం చేశారు. ఈ వ్యవహారంపై దర్యాప్తు సంస్థలకు ఫిర్యాదు చేస్తామని తెలిపారు.