telanagana
సాహితీ దిగ్గజం ముదిగొండ శివప్రసాద్‌ మృతిపట్ల సీఎం రేవంత్‌ రెడ్డి తీవ్ర సంతాపం!
హైదరాబాద్, సూర్య ప్రతినిధి :ప్రముఖ సాహితీవేత్త, బహుముఖ ప్రజ్ఞాశాలి ఆచార్య ముదిగొండ శివప్రసాద్‌ పరమపదించడంపై తెలంగాణ ముఖ్యమంత్రి ఎ. రేవంత్‌ రెడ్డి తీవ్ర దిగ్భ్రాంతి, సంతాపం వ్యక్తం చేశారు. నవలా రచయితగా, చరిత్ర పరిశోధకుడిగా, విమర్శకుడిగా మరియు వ్యాసకర్తగా సాహిత్య రంగానికి ఆచార్య శివప్రసాద్‌ అందించిన సేవలు ఎప్పటికీ చిరస్మరణీయమని కొనియాడారు.
మన దేశ చరిత్ర, సంస్కృతి, సంప్రదాయాలపై సమాజంలో, ముఖ్యంగా తెలుగు పాఠకులలో విశేష ఆసక్తిని పెంపొందించడంలో ఆయన కృషి మరువలేనిదని సీఎం గుర్తు చేసుకున్నారు. ముదిగొండ శివప్రసాద్‌ పవిత్ర ఆత్మకు శాంతి చేకూరాలని భగవంతుడిని ప్రార్థించిన ముఖ్యమంత్రి, వారి కుటుంబ సభ్యులకు, అభిమానులకు మరియు సాహితీ లోకానికి తన ప్రగాఢ సానుభూతిని తెలియజేశారు.
