రాజంపేటలో రైతుల ధర్నా..

సూర్య రాజంపేట:రాజంపేట మండలంలో వ్యవసాయానికి సరిపడా విద్యుత్ సరఫరా చేయకపోవడంతో ఇబ్బందులు ఎదుర్కొంటున్న రైతులు సోమవారం రాజంపేట మండల కేంద్రంలో ధర్నా నిర్వహించనున్నారు. విద్యుత్ కోతలకు నిరసనగా చేపట్టనున్న ఈ ధర్నాలో రైతులందరూ పాల్గొని తమ సమస్యలను అధికారుల దృష్టికి తీసుకెళ్లాలని రైతు సంఘం నాయకుడు చింతల స్వామి పిలుపునిచ్చారు.
ఆదివారం ఆయన మాట్లాడుతూ.. ప్రస్తుతం పంటలు కీలక దశలో ఉన్నాయని, ఈ సమయంలో నిరంతర విద్యుత్ సరఫరా ఎంతో అవసరమని అన్నారు. విద్యుత్ కోతల కారణంగా రైతులు వ్యవసాయ పనుల్లో ఇబ్బందులు ఎదుర్కొంటున్నారని పేర్కొన్నారు. ప్రభుత్వం రైతుల సమస్యలను గుర్తించి వ్యవసాయానికి నాణ్యమైన విద్యుత్‌ను అందించాలని డిమాండ్ చేశారు.రైతుల సమస్యల పరిష్కారం కోసం నిర్వహిస్తున్న ఈ ధర్నాకు రాజకీయాలకు అతీతంగా రైతులందరూ స్వచ్ఛందంగా తరలిరావాలని కోరారు. ఏ పార్టీకి చెందిన వారైనా రైతుల ప్రయోజనాలే ప్రధాన లక్ష్యంగా భావించి ఐక్యంగా ఉద్యమించాలని చింతల స్వామి విజ్ఞప్తి చేశారు. రైతులందరూ పెద్ద సంఖ్యలో పాల్గొని ధర్నాను విజయవంతం చేయాలని పిలుపునిచ్చారు.