telanagana
ప్లాస్టిక్‌ వినియోగం తగ్గించేందుకు స్టీల్‌ ప్లేట్ల పంపిణీ
సూర్య బాల్కొండ / ముప్కాల్ : ప్లాస్టిక్‌ వినియోగాన్ని తగ్గించి పర్యావరణ పరిరక్షణకు తోడ్పడే లక్ష్యంతో ముప్కాల్ మండలం వెంచిర్యాల గ్రామపంచాయతీ ఆధ్వర్యంలో ప్రత్యేక చర్యలు చేపట్టారు. ఇందులో భాగంగా శనివారం గ్రామంలోని దుర్గాదేవి మండపం వద్ద ఏర్పాటు చేసిన అన్నదాన కార్యక్రమంలో స్టీల్‌ ప్లేట్లను ఎంపీడీఓ బి. రమేష్‌, సర్పంచ్‌ నిమ్మల రాజామణి-శ్రీనివాస్‌ చేతుల మీదుగా పంపిణీ చేశారు.ఈ సందర్భంగా సర్పంచ్‌ మాట్లాడుతూ గ్రామంలో జరిగే వివాహాలు, పుట్టినరోజు వేడుకలు, ఇతర శుభకార్యాలు, సామాజిక కార్యక్రమాల్లో వినియోగించుకునేందుకు వీలుగా గ్రామపంచాయతీ ఆధ్వర్యంలో స్టీల్‌ ప్లేట్లను సమకూర్చినట్లు తెలిపారు. ప్లాస్టిక్‌ ప్లేట్ల వినియోగాన్ని తగ్గించడం ద్వారా పర్యావరణాన్ని కాపాడటంతో పాటు గ్రామాన్ని పరిశుభ్రంగా ఉంచేందుకు ఈ చర్య దోహదపడుతుందని పేర్కొన్నారు.ఈ కార్యక్రమంలో ఎంపీడీఓ బి. రమేష్‌, సర్పంచ్‌ నిమ్మల రాజామణి-శ్రీనివాస్‌, ఉపసర్పంచ్‌ అన్నపూర్ణ దేవి -మధు , వార్డు సభ్యులు, పంచాయతీ కార్యదర్శి, జీపీవో, దుర్గభవాని సేవా సమితి సభ్యులు, గ్రామ ప్రజలు తదితరులు పాల్గొన్నారు.
