హైదరాబాద్లోని మణికొండలో చెడ్డీ గ్యాంగ్ కలకలం
అపార్ట్మెంట్లో చొరబడి దొంగతనం, మహిళపై దాడికి యత్నం
సూర్య క్రైమ్ డెస్క్: హైదరాబాద్ నగరం మణికొండ ప్రాంతంలో చెడ్డీ గ్యాంగ్ ముఠా తీవ్ర అలజడి సృష్టించింది. ఆదివారం తెల్లవారుజామున సుమారు 3:20 గంటల సమయంలో స్థానిక ఫ్లోటిల్లా అపార్ట్మెంట్లోకి ఆరుగురు సభ్యులతో కూడిన ఆయుధధారులైన దుండగుల ముఠా చొరబడింది. అపార్ట్మెంట్ సమీపంలోని లేక్సైడ్ వద్ద ఉన్న రక్షణ ఫెన్సింగ్ను పదునైన పరికరాలతో కత్తిరించి భవనం ప్రాంగణంలోకి ప్రవేశించారు. అనంతరం సి బ్లాక్లోని ఒక ఫ్లాట్ తలుపులు బద్దలుగొట్టి లోపలికి ప్రవేశించిన దుండగులు దొంగతనానికి ఒడిగట్టారు.
ఇంట్లో శబ్దాలు రావడంతో మేల్కొన్న ఒక మహిళ దొంగలను నిరోధించేందుకు ప్రయత్నించింది. అయితే దొంగతనానికి వచ్చిన చెడ్డీ గ్యాంగ్ సభ్యులు తమ వద్ద ఉన్నారణ ఆయుధాలతో ఆ మహిళపై దాడికి తెగబడ్డారు. దాడి యత్నం నుంచి ఆమె చాకచక్యంగా తప్పించుకుని బిగ్గరగా కేకలు వేయడంతో, అపార్ట్మెంట్ వాసులు మేల్కొనే ప్రమాదముందని భావించిన దుండగులు అక్కడ లభించిన విలువైన వస్తువులతో పరారయ్యారు. అర్ధరాత్రి వేళ ఆయుధాలతో ముఠా సభ్యులు సంచరించిన దృశ్యాలు అపార్ట్మెంట్లలో తీవ్ర భయాందోళనలను నింపాయి.
ఘటనపై సమాచారం అందుకున్న రాయదుర్గం పోలీసులు వెంటనే సంఘటనా స్థలానికి చేరుకుని పరిశీలించారు. అపార్ట్మెంట్ ప్రాంగణంలోని సీసీటీవీ కెమెరాల్లో నమోదైన దృశ్యాలను క్షుణ్ణంగా పరిశీలించగా చెడ్డీ గ్యాంగ్ ముఠాకు చెందిన ఆరుగురు సభ్యులు సంచరించినట్లు స్పష్టమైంది. బాధితుల ఫిర్యాదు మేరకు పోలీసులు కేసు నమోదు చేసుకుని, క్లూస్ టీమ్ మరియు డాగ్ స్క్వాడ్తో ఆధారాలు సేకరించారు. నిందితులను పట్టుకోవడానికి ప్రత్యేక బృందాలను రంగంలోకి దింపినట్లు, త్వరలోనే ముఠాను అరెస్ట్ చేస్తామని పోలీసులు వెల్లడించారు.
