ఘనంగా శ్రీ పెద్దమ్మ తల్లి ఆలయ రెండో వార్షికోత్సవం

సూర్య, ఆర్మూర్ : ఆర్మూర్ పట్టణంలోని అంకాపూర్ శివారులో గల శ్రీ పెద్దమ్మ తల్లి ఆలయంలో రెండో వార్షికోత్సవ వేడుకలను శనివారం అత్యంత వైభవంగా నిర్వహించారు. ముదిరాజ్ సంఘం కుల పెద్దలు,  సభ్యులు, ఆలయ కమిటీ సభ్యుల ఆధ్వర్యంలో జరిగిన ఈ వేడుకలకు భక్తులు పెద్ద సంఖ్యలో తరలివచ్చారు.వార్షికోత్సవంలో భాగంగా తెల్లవారుజామున పెద్దమ్మ తల్లికి పంచామృతాలతో ప్రత్యేక అభిషేకాలు నిర్వహించి, అమ్మవారికి విశేష పూజలు చేశారు. అనంతరం గణపతి పూజ, గౌరీ పూజలతో పాటు చండీ హోమాన్ని వేదమంత్రోచ్ఛారణల మధ్య భక్తిశ్రద్ధలతో నిర్వహించారు. ఈ సందర్భంగా సుమారు వెయ్యి మందికి పైగా మహిళలు సామూహిక కుంకుమార్చనలో పాల్గొని అమ్మవారికి ప్రత్యేక పూజలు చేశారు.అమ్మవారి దర్శనం కోసం వచ్చిన భక్తులతో ఆలయ ప్రాంగణం సందడిగా మారింది. వార్షికోత్సవానికి విచ్చేసిన భక్తులందరికీ ఆలయ కమిటీ ఆధ్వర్యంలో అన్నప్రసాద వితరణ చేపట్టారు.ఈ కార్యక్రమంలో పెద్ద బజార్ ముదిరాజ్ సంఘం అధ్యక్షుడు, కుల పెద్దలు, రాజాం నగర్ అధ్యక్షుడు జంగిడి, శ్రీ పెద్దమ్మ తల్లి ఆలయ అధ్యక్షుడు గాజం మచ్చందర్, జక్కం ప్రసాద్, బొండ్ల గోపి, వేముల భోజన్న, మందుల బాలనందు, సైదు రమేష్, సాంబడి ఆనంద్‌తో పాటు ముదిరాజ్ సంఘం సభ్యులు, ఆలయ కమిటీ ప్రతినిధులు, మహిళలు, భక్తులు పెద్ద సంఖ్యలో పాల్గొన్నారు.