వుషులో రజతం సాధించిన నౌరెమ్ రోషిబినా దేవి

అభినందించిన ప్రధాని నరేంద్ర మోదీ!
సూర్య స్పోర్ట్స్ డెస్క్: ఆసియా క్రీడల మహిళల వుషు 60 కేజీల సాండా విభాగంలో రజత పతకం సాధించిన భారత క్రీడాకారిణి నౌరెమ్ రోషిబినా దేవికి ప్రధాన మంత్రి నరేంద్ర మోదీ గురువారం అభినందనలు తెలిపారు. వరుసగా మూడు ఆసియా క్రీడల్లో పతకాలు సాధించడం ఆమె స్థిరత్వానికి, పట్టుదలకు నిదర్శనమని ప్రధాని కార్యాలయం (PMO) ఎక్స్ (ట్విట్టర్) వేదికగా కొనియాడింది.

ఐచి ప్రిఫెక్చురల్ మార్షల్ ఆర్ట్స్ హాల్‌లో జరిగిన తీవ్ర ఉత్కంఠభరితమైన ఫైనల్ పోరులో 25 ఏళ్ల రోషిబినా దేవి చైనాకు చెందిన ఝాంగ్ షియావోయు చేతిలో 0-2 తేడాతో ఓటమిపాలై రజతంతో సరిపెట్టుకుంది. గత ఆసియా క్రీడల్లో రజతం, 2018లో కాంస్యం గెలుచుకున్న ఈ మణిపూర్ అథ్లెట్, వరుసగా మూడో పతకాన్ని తన ఖాతాలో వేసుకుంది. మ్యాచ్ అనంతరం రోషిబినా మాట్లాడుతూ.. దేశానికి స్వర్ణం అందించలేకపోయినందుకు విచారం వ్యక్తం చేస్తూ, భవిష్యత్తు పోటీల్లో తన తప్పులను సరిదిద్దుకుని మరింత బలంగా తిరిగొస్తానని ధీమా వ్యక్తం చేసింది.