హర్యానాలో కశ్మీర్ ప్రయాణికుల బస్సుపై రాళ్లదాడి: తీవ్రంగా ఖండించిన జమ్మూకశ్మీర్ సీఎం ఒమర్ అబ్దుల్లా.

సూర్య నేషనల్ బ్యూరో, శ్రీనగర్: హర్యానా రాష్ట్రం కురుక్షేత్ర సమీపంలో జమ్మూకశ్మీర్‌కు వెళ్తున్న ప్రయాణికుల బస్సుపై గుర్తుతెలియని దుండగులు రాళ్లు, ఇటుకలతో దాడి చేసిన ఘటన తీవ్ర కలకలం రేపింది. ఢిల్లీ నుంచి శ్రీనగర్‌కు దాదాపు 40 మంది ప్రయాణికులతో వెళ్తున్న జేకే రిజిస్ట్రేషన్ కలిగిన ప్రైవేట్ బస్సును లక్ష్యంగా చేసుకుని ఈ దాడికి పాల్పడగా, ఈ ఘటనలో ఒక వృద్ధ కశ్మీరీ ప్రయాణికుడికి గాయాలయ్యాయి. బస్సు అద్దాలు ధ్వంసం కావడంతో లోపల ఉన్న మహిళలు, చిన్నారులు భయాందోళనలకు గురయ్యారు.

ఘటన దురదృష్టకరం – హర్యానా సర్కార్ దృష్టికి తీసుకెళ్లిన ఒమర్ అబ్దుల్లా:
ఈ దాడి ఘటనపై జమ్మూకశ్మీర్ ముఖ్యమంత్రి ఒమర్ అబ్దుల్లా తీవ్ర విచారం వ్యక్తం చేశారు. "ఇలాంటి దురదృష్టకర సంఘటనలు ఎట్టిపరిస్థితుల్లోనూ జరగకూడదు. హర్యానా ముఖ్యమంత్రి నయాబ్ సింగ్ సైనీ ప్రభుత్వం, అక్కడి పోలీసు యంత్రాంగం నిందితులను వెంటనే అరెస్ట్ చేసి కఠిన చర్యలు తీసుకోవాలి. భవిష్యత్తులో ఇలాంటి ఘటనలు పునరావృతం కాకుండా తగిన భద్రతా చర్యలు చేపట్టాలి" అని ఆయన ‘ఎక్స్’ (ట్విట్టర్) వేదికగా కోరారు. జమ్మూకశ్మీర్ సీఎంఓ అధికారులు హర్యానా ప్రభుత్వంతో సంప్రదింపులు జరిపి ప్రయాణికుల భద్రతపై ఆరా తీయగా, చట్టప్రకారం కఠిన చర్యలు తీసుకుంటామని హర్యానా యంత్రాంగం హామీ ఇచ్చింది.

రాజకీయ పార్టీల తీవ్ర ఖండన:
ఈ దాడిని నేషనల్ కాన్ఫరెన్స్ (NC), పీడీపీ, బీజేపీ నేతలు ముక్తకంఠంతో ఖండించారు. కేవలం ప్రాంతీయ గుర్తింపు ఆధారంగా కశ్మీరీ ప్రయాణికులను లక్ష్యంగా చేసుకోవడం సరికాదని, దేశంలోని ఏ ప్రాంతంలోనైనా పౌరులకు సమాన గౌరవం, భద్రత కల్పించాల్సిన బాధ్యత ఉందని నేతలు స్పష్టం చేశారు. ఈ ఉదంతంపై సమగ్ర దర్యాప్తు జరిపి బాధ్యులపై కఠిన చట్టపరమైన చర్యలు చేపట్టాలని వారు డిమాండ్ చేశారు.